السبت، نوفمبر ٠٨، ٢٠٠٨

شهرالعسل خلص


قبل زواجي كانت حياتي في نواحيها العمليه اشبه بغرفه كاملة التجهيز؛لا ينقصها شيء،حتي الكماليات ..كانت موجوده و بوفره .لكن كان يتحتم ان اتعهد هذه الغرفه بالنظافه و التنظيم باستمرار .و كانت هذه المهمه تحتاج لفردين،لا لفرد واحد،واحد للتنظيم و الاداره و اخر لاعمال اخري بعيده عن التنظيم مثل الاعمال خارج المنزل و الانشطه الثقافيه بانواعها المختلفه .حتي وقت قريب كنت استيقظ من نومي باكرا للذهاب الي العمل و كان اول عمل صباحي يومي هو اعداد الافطار لنفسي و كان دائما افطار مش و لا بد،ملابسي اكويها لنفسي ،اعود من العمل احيانا كثيره و اجهز غدائي بنفسي و غالبا بيكون مش و لا بد لاني باجهزه لنفسي،و كانت ملابسي كثيرا ما تتسخ و ارفض خلعها للغسيل لاني لم ارغب في تحميل امي مزيد من الاعباءفاوفر عليها غسيل الملابس الدخليه ايضا لاكثر من اسبوع حتي تتسخ تماما و كانت امي تعنفني بشده علي اهمالي لنفسي و نظافة ملابسي.
بعد الزواج طرات تغييرات كثيره علي الكثير من جوانب حياتي و اهم هذه التغييرات هي المتعلقه بالجانب المهمل في حياتي ،فلم تعد امي مسؤله عنه فلا استحي من تحميل الزوجه بالتكاليف الكثيره بخلاف انها نفسها لا تترك لي فرصة الشكوي من الاهمال فتزايد علي اهتمامي بنفسي فاحاطت هذا الجانب بالاغراق في رعايته .اول ايام الزواج كنت اشبه بالوالي العثماني !!تفاح منزوع القلب.. تلاقي،بلح شرائح .. ممكن،عنب منزوع البذر و الحبه مقسومه نصفين.. موجود و مسؤليتي الوحيده هي مد يدي لالتقاط الثمره فقط و اكلها .طعامي مواعيده لا تتخلف،و ملابسي لا تبقي علي جسدي لاكثر من يومين و في الغالب هي البادئه بطلب غسيلها و احيانا اطلب انا فلا حرج الان من اي طلب او تكليف طالما الطلب من الزوجه لا من الام .
الان شهر العسل فات و انتهي و ذهبت السكره و جاءت الفكره و دائما انا غير متفائل لا بالزواج و لا بالعزوبيه ،و متشائم منهما معا بصفه مستمره فامضيت ثلاثين سنه بلا زواج علي حسبة ان متوسط العمرللانسان ستين سنه فيبقي لي ثلاثين اخري بالزواج .و انا في انتظار انتهاء الثلاثين الاخري كي اعرف اي الثلاثينيتين كانت افضل من اختها؟ثلاثين العزوبيه ،ام ثلاثين الزواج؟فاذا كانت ثلاثين العزوبيه افضل ؛عرفت ان العزوبيه افضل من الزواج و انني اخطات .و اذا كانت الاخري علمت ان الخير فيما فعلته بعد الثلاثين فاستريح
الله اعلم
جايز كل واحده منهما"الثلاثينيتين" تلعن اختها
عموما
انا مش مستعجل
ان غدا لناظره قريب
بعد ثلاثين سنه هنشوف
.................................................................

تابعوا مدونة فنون جميله و فلسفة حياة

هناك ٢٧ تعليقًا:

^ H@fSS@^ يقول...

hhhhhhhhhhhhhhhh
حلوة حكاية انك حتستنى لما التلاتين التانية تخلص و تشوف مين فيهم كانت كويسة

بس ياترى الدلع ده كله خلص بعد شهر العسل و لامكمل؟؟

احمد أبو العلا يقول...

يااااااااااه تلاتين سنة
خد عندك تجربة واحد خبير...... صحيح موضوع التفاح والبلح والعنب ده تشيله من دماغك خالص بعد شهر العسل والانتقال من الحياة الافتراضية الى الحياة الواقعية بس ما يمنعش برضه من الاستمتاع بحياة اخرى جميلة بعد الزواج وخصوصا عند ارتباط شخصين متفاهمين وعاقلين
تمنياتى لك بالسعادة

احمد أبو العلا يقول...

يااااااااااه تلاتين سنة
خد عندك تجربة واحد خبير...... صحيح موضوع التفاح والبلح والعنب ده تشيله من دماغك خالص بعد شهر العسل والانتقال من الحياة الافتراضية الى الحياة الواقعية بس ما يمنعش برضه من الاستمتاع بحياة اخرى جميلة بعد الزواج وخصوصا عند ارتباط شخصين متفاهمين وعاقلين
تمنياتى لك بالسعادة

Sweet Violet يقول...

ههههههههههههههههههه

ده انت بالك طويل قوووووووووووووووى

لسه هاتستنى 30 سنه عشان تحكم

ربنا يجعل ايامكم كلها سعاده

و خليك متفائل بقى (:

نعكشة يقول...

:D

ربنا يقوينا و بعد 30 سنة نعرف النتيجة بقة :D

هههههههههههههههه

الله معك

لا إن شاء الله تكون سنوات الزواج افضل بكثير
و يرزقك يا رب بالذرية الصالحة

آمين

سلام

-_- يقول...

ايه ده ؟؟

اروح شوية و ارجع اتلاقيك اتجوزت ؟

مبروك يا سيدي و ان شاء الله تكون تلاتينة سعيدة !!

بنت القمر يقول...

يا سااااتر
انت مستكتر تقول انك مبسوط
وفرحان
وان بقالك ست ترعاك وتدلعك
قول الحمد لله عشان ربنا يديمها عليك
طبعا الدلع ده ممكن يقل اول ما ربنا يكرمك بحمل
ويا ريت ساعتها تفتكر اليومين دول لما هي تكون تعبانه
تفتكر البلح المفصص والعنب المنضف
و تعمل لها لقمه قبل ما تروح الشغل ولا تديها دوا الترجيع
ولا ترحمها يوم في الاسبوع وتجيب اكل جاهز
طبيعي انها كده وده معناه انها بنت ناس وكويسه
ومش داخله هي تتدلع عليك وتقرفك
بالعكس هي باديه بالمعروف اهو
قول الحمد لله يانون
تلاتين سنه ايه اللي ها تستناهم؟؟!!
ربنا يكفيكم شر العين ويبارك ليكم

عين فى الجنة يقول...

لو عاوز التلاتين سنة الجايين يكونوا اجمل ، ما تخليش المدام تقرا التدوينة دى:)))))

kafrawy يقول...

هههههههههههههههههههههههههه

ربنا يديك طوله العمر و تشوف اولادك بعد التلاتنيايه التانيه هيعملوا ايه

جنّي يقول...

السلام عليكم

الف الف مبارك .. متأخرة معلش بقى ..

والله فرحت فيك قصدي فرحتلك ..

وانت ناوي تستنى ثلاثين سنة يا قلبك ..

هي بتبان من الأول ولو كسرت العضم بسيفك يبقى كل سنة وانت طيب ..

طيب ايه رأيك في النكتة دي عن الزواج :
واحد بيقول لواحد الزواج زي برميل مليان عسل من فوق وزفت من تحت ..
قاله تتصور اني فتحت البرميل من تحت ..

الف مبارك وان شاء الله ربنا يرزقك ببنين وبنات تقر بهم عينك ..

سلام

غير معرف يقول...

اخص عليك يانون انت عامل زى القطط بتاكل وتنكر امال مين ال كان بيغسلك ويكويلك ويجهزلك الاكل دا انت كنت كل يومين تخلينى اغسل ولا الاكل كنت بتتامر بس على فكرة اللى مبيعترفش بالجميل اخرتةبتبقى وحشة وانا كنت بعمل دا كلة لمين المفروض كنت تقول اختى كانت بتعملى ولما اتجوزت ضعت من غيرها روح الهى تجيب ولد وتسمية عتريس ونقولك يابو عتريس بس على فكرة التلاتين سنة اللى جاين طبعا وان شاء اللة هايكونوا احسن من الفاتوا سلالالالالالالالالالالالالالالالام

سنابل يقول...

مبروك
بس الدلع كان زيادة أوى ...
بلح شرايح وعنب منزوع البزور ؟ .لا الصراحة قصرت فين اللب المقشر ؟

ذو النون المصري يقول...

حفصه
لا مش مكمل ما هي اصلها مش بمزاجي

ذو النون المصري يقول...

احمد ابو العلا
طمنتني
و اتمني لك حياة مديده سعيده باذن الله

ذو النون المصري يقول...

ضد التيار
مضطر استني

ذو النون المصري يقول...

نعكشه
ان شاء الله
نتمني
و انا منتظر علشان اشوف

ذو النون المصري يقول...

شارم
الله يبارك فيك
عقبالك

ذو النون المصري يقول...

بنت القمر
مش مستكتر و لا حاجه
بس تفاءلتش بالزواج قبل ما اتجوز
فمستغرب

ذو النون المصري يقول...

ا راجي
اشكرك جدا
و اتمني ذلك للجميع
تحياتي

ذو النون المصري يقول...

كفراوي
اشكرك جدا
و اتمني لك بالمثل و اكثر

ذو النون المصري يقول...

مصر الحره
تحت امرك و اعلن كما شئت

ذو النون المصري يقول...

جني
الله ينكد عليك
يعني قصدك ان العسل باين لي فوق دلوقت و هشوف الزفت بعدين!!!!!!!!!!!!!
طب خبي
هههههههههههههه
نكته حلوه و ضحكت عليها

ذو النون المصري يقول...

غير معرف
عرفتك خلاص
انتي مني
بس مش كل حاجه كنتي بتعمليها الا لما روحي بتطلع اصلا
اوعي تنسي دي

ذو النون المصري يقول...

سنابل القمح
ضحكتيني انا و زوجتي علي الكلمتين دول
و ياريتني كنت قريت تعليقك من زمان كنت خليتها تقشرلي اللب
ههههههههههههههه
تحياتي

ذو النون المصري يقول...

عقبال الجميع

زمان الوصل يقول...

هههههههههه .. بجد بوست تحفه جدّا أنا لقيت نفسى باضحك بصوت عالى بعد انتهائى من قراءته ..

مش عارفه إيه اللىّ ضحّكنى أكتر ؟ موضوع العنبه منزوعة البذر المقسومه نصفين ولاّ موضوع التلاتين سنه اللىّ هنشوفك بعدهم عشان تقول لنا النتيجه :) ربنا يسعدك على أى حال

ذو النون المصري يقول...

زمان الوصل
اشكرك جدا علي الدعوه و اتمني لك حياة سعيده مع من تحب