الثلاثاء، يونيو ٢٦، ٢٠٠٧

جاعت الحره و اكلت بثديها

ذكرت صحيفة المصري اليوم الاليكترونيه ان هناك مهنه جديده بدات في الظهور في كليات الطب!!و انها نشات بسبب حالة الفقر التي انتشرت بضراوه في مختلف قطاعات الشعب المصري فالجات كثير من الناس الي مهن لم يكن في الحسبان او الخيال انها ستكون مصدر رزقهم في يوم من الايامنهذه المهنه هي موديلات بكليات الطب!!حيث تاتي المراه و تخلع كل ملابسها و تتمدد عاريه تماما علي طاولة التدريس امام مجموعه من الطلاب بغرض الدراسه و تتقاضي المراه عن هذا العمل عشرين جنيه يوميا و ان هذه المهنه يعمل بها بعض الرجال ايضا
يقول الطلبه انهم يجدون حرجا شديدا في التعامل مع امراه عاريه تماما غير انهم بالممارسه تعودوا علي ذلك كما ان بعضهم لا يعيرها اي اهتمام و يعاملها بنوع من الجفاء مما يجرح شعورهن احيانا و يؤكد طلبه اخرون انهم يرون فائده لهذا النظام من التدريس حيث يقضي علي رهبة العمل الحقيقي و يعطي جراه علي التجربه في الوظيفه
تقول احدي السيدات العاملات بهذه المهنه انها تعمل بها لاجل الانفاق علي طفلين حيث طلقها ابوهم و هجرهم و لا يعرفون عنه شيء منذ سنين ،،و انها تخاف ان يعرف اطفالها يوما نوع عملها الذي تنفق عليهم منه كما انها تري ان الاطباء ليس لهم زنب فيما ال اليه حالها و قالت انها تتمني ان يكون احد طفليها طبيبا مثلهم
و هناك ايضا رجال يعملون في هذه المهنه حيث قال احدهم انه يعمل بها لاجل الحصول علي دواء فقط و لا يحصل علي الاجر فهو يعمل مقابل الدواء و اكد ان الكثير من الاطباء صاروا اصدقاؤه و انه يعرف منهم الكثير بحكم العمل
و بعد ؟؟؟ما هو مصير نساؤنا بعد ان زحف الفقر و زحفهم علي بطونهم بسبب الجوع و اجبرهن علي خلع ملابسهن و الاكل بثديهن خلافا للمثل لا تاكل بثديها!!!!هل فكر في حال هذه المراه دعاة الاسلام السياسي او الوهابي سواء الاخوان او السلفيين ؟؟؟؟؟
الاخوان في نفس اليوم كانوا علي مادبة افطار مع مبارك قالوا بعد المادبه للدستور ان الافطار كان حاجه جميله مشفناهاش قبل كده و ان رئيس كان راجل حلو و طيب و جميل معاهم،و قالوا ان الافطار كان محشي حاجه صفرا لكن منعرفش هي ايه و الشاي كان غير الشاي اللي نعرفه و اكدوا ان فيه شيء هيحصل في البلد وا ن الديمقراطيه هتتحقق و ان اللي احنا عاوزينه هيحصل قريب
بصراحه انا احترت معهم لاني لم اعد اعرف لهم منحي و لا اتجاه يتحركون علي اساسه هم مع الفقراء ام مع النظام ؟ و هل عزومه افطار و شاي ممكن تغير الاراء بهذه السرعه؟
و السلفيين محتارين مع النقاب و لا زالوا يحرمون كشف وجه المراه و ادي الفقر عن يسارهم كشف كل اعضاء المراه فما قولهم ؟ هل سيدعون المراه ان تتمسك بالرمق الاخير في روحها و تلفظ انفاسها و عيالها جوعا و تتمسك بالنقاب في ظل هذه الظروف؟انا شايف بصراحه ان هذه الدعوه سخيفه جدا

و اذا كانوا يرون انهم سيستمرون علي نهجهم فانا اراهم في مواجهة الفقر و الناس في المنتصف و الفقر يعري نساء من هنا و هم ينقبون نساء من هناك حتي سياتي علينا يوم نري نصف النساء عاريات و النصف الاخر منقبات حتي تبدا المعركه بينهم و بين الفقر نفسه و المنتصر سياخذ نساء الطرف الاخر غنيمه و ما اري الا ان الفقر سينتصر لانهم لا يملكون له منهجا و لا يفكرون فيه اصلا .كل ما يشغل بالهم تحقيق العدد الاكبر من الملتحين و المنقبات فمسالة العدد و الظهور في المجتمع بهذا العدد هي ما يهمهم ..اما الفقيرات الائي يضطرهن الفقر الي التعري فلا حل عندهم لهن الا الصبر،،!!هذا هو الحل الاسلامي عندهم

هناك ٢٢ تعليقًا:

^ H@fSS@^ يقول...

لا حول و لا قووة الا بالله
لو كان الفقر رجلا لقتلته
صدقت في التحليل و السؤال
هل فعلا الاخوان المسلمين بيتغير رايهم بغدوة و كوباية شاي؟؟
و ايه فايدة ان الفكر الوهابي او السلفيي بيشدد على النقاب بينما حال الواقع بيقول ان نص الستات بتتعرى عشان تعيش

احنا داخلين على مصيبة
ربنا ييرحمنا
تحياتي

******
ليا رجاء
الصورة بتاعت المسلمين اللي بيصلوا و عليهم علامة كوكا كولا دي شيلها لو سمحت لانها متفبركة و مافيش اي فايدة منها غير تاجيج مشاعر مالهاش لازمة
مش عاوزين مشاعر لكن عاوزين نشغل عقلنا
و في النهاية انت حر لكن انت عزيز عليا كصديق

تحياتي كمان مرة

شيماء الجيزى يقول...

هذه بداية المشوار
هذا بداية الفقر والتعب والدنك
وبيع الجسد بالحلال حراما

..............
الكل يبحث عن قوته
ودستوره

بجد مش قادرة اقول
غير لنا الله
...............

اسلوبك جميل
تحياتى يا ذو النون

ذو النون المصري يقول...

حفصه
فعلا ايه فايدة التشديد علي النقاب و غيره و نص الستات بتتعري لاجل القوت؟
بالنسبه للصوره انا عارف انها متفبركه لكن مش عارف صراحه هشيلها ازاي لاني مشلتش صور قبل كده من البوست عموما هروح احاول
بالمناسبه
انا عاوز احط صوره للبروفيل لنفسي و عاوز اعرف الفيديو بيتحط ازاي في البوست و مفيش غيرك يشرح لي الموضوع ده ياريت تكوني عارفه

ذو النون المصري يقول...

شيماء الجيزي
لم يعد لنا امام الغزو الفكري بتياراته المختلفه و التي لم يهتم احدها بالفقراء الا ان نقول ربنا يسترها
سعيد جدا بزيارتك
تحياتي

.:.-=- ELGaZaLy-=-.:. يقول...

السلام عليكم ورحمة الله وبركاته

تعرف انى بقال ساعة ونص مش قادر ارد

^ H@fSS@^ يقول...

ذو النون انا بعتلك ايميل مفنصل عن كيفية ازالة صورة و تنزيل فيديو لكن معرفش ازاي بيحطوا صورة بروفيل لاني مش انا اللي حاطه بتاعي
و على راي شهروزة
نياهااهااااااا

اكرر ايميل يعني مش حتلاقيني اونلاين
افتح الانبوكس بتاعك و حتلاقيه

بقلك اخر حل انك تديني الباسوورد و انا اشطبلك البلوج لوكس ديلوكس محصلش

سلامو

ذو النون المصري يقول...

الغزالي
انا كمان و الله احيانا اما بعرف ايه اللي ممكن اعلق بيه علي كتابات الاصدقاء لان الحال اصبح غايه في الفساد
ربنا يستر

ذو النون المصري يقول...

حفصه
انا فتحت الايميل و مش عارف ليه الرساله مش موجوده انا قريت سلام يا شناوي و بس
تحياتي

غير معرف يقول...

ذو النون

قريت المقالة و للأسف مش قادر ألاقي تعليق غير اللي قاله سيدنا الإمام علي

لو كان الفقر رجلا لقتلته

للأسف دي مش النهاية دي بداية إنهيار تدريجي

yasmina يقول...

فعلا تساؤلاتك في مكانها
فهل العدد هو ما بفرق معنا فقط في هذه الايام فكل واحد يريد ان يجمع من انصاره اكثر وان يزيد عدد المنقبات والملتحين ولا يهمهم على حساب ماذا
حتى الاخلاق لم تعد مهمة في حالة اذا كانت المراة منقبة

مع ان النقاب ليس له صلة بالاخلاق ولا العفة
لم لا نبحث اولا عن اكل لقمة العيش بشرف وكرامة وتامينها للكثيرين من المحتاجين

ذو النون المصري يقول...

مصري
هي للاسف فعلا كما قلت ليست نهاية الماسي بل هي بداية انهيار و النهايه هتكون اسود من قرن الخروب
اشكرك علي المشاركه
تحياتي

ذو النون المصري يقول...

ياسمينا
فعلا الموضوع اصبح منظره في منظره
ما العلاقه بين اخفاء الوجه و الاخلاق نحن نعرف ان امراه بغي من بني اسرائيل رقت لكلب و سقته في حكايه طويله ذات مغزي فكان جزاؤها رغم الدعاره انها في الجنه
و فعلا العدد صار هو الاهم بالنسبه للجماعات و ليس كيف العدد لان بعضهم حريص علي ان تعليم البنات ليس ذو ضروره الا لاغراض التربيه و المنزل فلو كانت السيده التي اضطرتها الظروف للتعري تعرف عملا اخر و علمها اهلها شيئا اخر لاستطاعت مواجهة اعباء الحياه بطريقه افضل
شكرا علي المشاركه تحياتي

nour يقول...

انا خلاص كل يوم بحس ان البلد دى بتطبقى على قلبى اكتر و اكتر
معنى كده بقى ان احنا نتعاطف مع الحراميه,,الصغيرين مش الكبار,,و المومس و القتله المحترفين لانهم بيعملوا كده بسبب الفقر
و الله بتكلم بجد
انا عن نفسى بقيت اتعاطف معاهم
انا اكتئبت من البوست ده زيادة:((
بس هى الحقيقه لازم تقهر كده

ma 3lina يقول...

فيه نقطة عدم اتصال في البوست

هل حضرتك مع أكل الحرة بثدييها كمخرج ضد الفقر .. وتهاجم الإسلاميين الذي ييضيقون على الناس في معايشهم

ولا حضرتك ضد العري بس بتهاجم الإسلاميين برضه

أظن من الأفضل بدلا أن نهاجم اشخاص أيا كان توجهاتهم يحاولوا يوجدوا حلول قد تصح وقد تخطأ أن نهاجم جميعا من تسبب بفقر بلادنا .. لا ان نتفرغ لاتهام الآخرين بالسخافة

بالمناسبة النقاب من شعائر الدين أيا كان حكمه ومش حكر ع الوهابية وما ينفعش نسميه دعوة سخيفة ..
البوطي العالم السوري من الناس اللي ضد ما يسمى بالوهابية ومع ذلك من من أكبر المؤيدين لوجوب النقاب

^ H@fSS@^ يقول...

النقاب ماهوش فرض اطلاقا و لا في اي نص موثق عليه من القران بوجوب فرضيته
النقاب ده عادة عربية يهودية قديمة كانت الستات السيئات السمعة بيبلسوه لما يروحوا يمارسوا الرذيلة و ميحبوش يتعرف وشهم

يا ريت توسع قراءات سواء كانت متفقه مع وجهة نظرك او مختلفة عنها
و كمان سؤال لو النقاب من شعائر الدين ايه موجود يكافئه للرجالة؟؟؟

ma 3lina يقول...

أستاذتنا
واضح إن حضرتك عارفة قراءاتي شكلها إيه
:)
عموما اشكرك على النصيحة وياريت نعمل بيها كلنا

تحياتي وشكرا

ذو النون المصري يقول...

نور
احنا الظروف من شدة قسوتها احساسنا كلنا ان البلد خلاص بتطبق علي نفوسنا كلنا و لم تعد تسع الا الاغنياء
ربنا يسهلها للفقراء و يقدروا يستحملوا لحد ما النجده تيجي

ذو النون المصري يقول...

ما علينا
انا لست مع العري اطلاقا و لست ضد الحركات الاسلاميه بل انا ضد بعض مناهج التفكير و عدم ترتيب الاولويات لاننا امام ناس الفقر عندهم و القضاء عليه رغم انه مطلب اسلامي حيث استعاذ الرسول منه بعد الكفر و حض علي خشونة اليد و اعتبر العمل كالجهاد في سبيل الله ان كان لرعاية اسره غير قادره ،،كل هذا التراث الديني في مقاومة الفقر و هناك من لا يهتم به رغم انه سبب اول لتنصر اي مسلم و خروجه عن دينه في افريقيا مثلا كما ان الفقر سبب اساسي لكل مشاكلنا الاجتماعيه و منها الجريمه و الان التعري امام طلاب الطب لاجل مبلغ عشرين جنيه اما كل هذه لاوضاع السيئه نجد تيارات دينيه باكملها جل همها هو ان ترتدي النساء النقاب و هذه الدعوه دون النظر لمدي شرعيتها تعتبر سخيفه جدا في هذا الموضع
هذا ما قصدته
اما عن رايي في الموضوع فقد قتله للاسف كثير من علمائنا بحثا بدلا من قتل مشكلة الفقر و ليتهم ادخروا هذه الجهود لهذه المشكله و انتهي رايهم الي الاختلاف الي فرقتين مؤيدين و معارضين و هناك طرف وسط
انا اري راي المعارضين
اشكرك جدا علي المداخله و المتابعه
تحياتي

ذو النون المصري يقول...

حفصه
انا اري نفس الراي ان النقاب ليس فرضا اما عن حكاية العاده اليهوديه فانا اول مره اسمع هذه المعلومه
و عموما كان نفسي اختلاف علمائنا و نضالهم يكون لاجل المتاعيس الذين اكلوا بالتعري امام الناس مضطرين لا مختارين

ذو النون المصري يقول...

ما علينا
مفيش اتهام بقلة الثاقفه و لا حاجه
و لا اشكال من المحاوره و الاختلاف في الراي
اشكرك علي المتابعه
تحياتي

الدبور يقول...

واقع فعلا وعايشته اثناء فترة دراستي في الكليه
ومر علي من تلك النماذج رجالا ونساءا عده
و للعلم هم يعرفون مواعيد الامتحانات في جميع كليات الطب وينتهون من كليه و تبدا الرحله لكليه اخري
بحثا عن بعض الجنيهات

غير معرف يقول...

الدبور باشا شخصيا رجع تاني يا جدعان
دا ايه الهنا ده؟
الف حمد الله علي السلامه
انا سعيد جدا بعودتك و رجوعك للتدوين
تحياتي الغاليه لك
ذو النون المصري