الخميس، يونيو 28، 2007

سوسه المفروسه ،،عيد ميلاد و تحيه واجبه

سوسه المفروسه
تحيه في عيد ميلادها الاول
..............................................
من المدونات التي انصح اي عابر سبيل هنا ان يقراها بتمعن و باهتمام مدونة سوسه المفروسه!!و لا انصح بقراءة اخر بوست كعادة قراء المدونات بل انصح بقراءة كل الارشيف لانه باختصار و بلا مجامله ارشيف يستحق المطالعه و متابعته تعطي القاريء فكره واضحه عن شخصية صاحبة المدونه و ابرز ملامحها نو التي اختارت بنفسها تعبير سوسه المفروسه كي تعبر عن هذه الملامح الشخصيه
اول مره تعرفت فيها علي مدونات النت عموما كانت في اغسطس الماضي و لم اكن اقرا الا الوعي المصري و ادمنتها و هي التي اغرتني اولا بعمل واحده و في نفس الوقت بعدم التفكير في عمل واحده .و بعد مده تعرفت علي بنت مصريه قارئا فقط و من قائمة المفضلات قرات هذه الاسم الغريب جدا"سوسه المفروسه"بصراحه ضحكت علي الاسم و اعتبرته من تقاليع النت فقررت ان اقرا ما تكتب صاحبته
علي ما اذكر كان اول بوست طالعته عند سوسه ربما كان عن احمدي نجاد و لمحت في عنوانه روح فكهه و ساخره"احمدي نجاد اتكلم يا مينز"و بعده قرات بوستات اخري كان كل بوست فيها ينم عن خفة دم واضحه سواء كان في الكلام او الصور المصاحبه للكلام
اثناء رحلتي التدوينيه القصيرة العمر كان لازم الاقي حد اسئله عن الغوامض و كانت سوسه هي دائما من اسئلها و كانت اجاباتها ايضا لا تخلو من خفة دم ،،في مره اذكر اني و ربما واحد من الناس طلبنا منها تعرفنا كيفية عمل الشات بوكس و هددنا انا و هو بحرق المدونه ههههههههههههه و قالت لنا يومها حكايات عن النسوان اللي وراها و ياكلوا الزلط ههههههههو فهمتنا بهدوء عمل الشات بوكس و قالت لنا يومها بالحرف الواحد شوف يا مدون انت وهو و كاننا قرطة عساكر في كتيبه عملاها لحسابها و ضحكت كتير علي اسلوبها في الكلام معنا يومها و حصل هذا مرات عديده
لسوسه المفروسه اسلوب جذاب جدا في الحكي ،،سهل و خفيف الدم حتي مع الصور كما قلت و العناوين التي تتخذها للبوستات ،فاذكر انها اجابت عن ثلاث تيجان دفعه واحده و كان تحت عنوان
علشان خاطر عيونهم
و كانت تحته هذه الصوره
اظنها لكولينا الحكم الدولي الشهير لكرة القدم
مره تانيه شفت الصوره و لم اتخيل بخيالي الغير خفيف الظل ان هذه الصوره سيكون تحتها هذه العنوان،و الصوره كما هو واضح لقطه بعيون جريئه!!!!!!!؟لا مش جريئه ،،جريئه متنفعش لان العيون كبير جدا
عنوان سوسه كان
القطط العمياء
ههههههههههههههههههههههههههههه



الصوره دي كانت عن التوريث و مؤتمرات الحزب الوطني و كان البوست بالرغم من كونه مؤلم الا انه كان دمه خفيف
عنوانه كان
هتشربوه يعني هتشربوه
ههههههههههههههههههه

العناون هنا كان
سوسه علي صفحات الجرائد
و احتفلت فيه بنشر جريدة العربي الناصري لمقال لها في الجريده تحت اسم سوسه المفروسه

و مهم جدا ان تقرا ما كتبته بعد رمضان مباشرة و عن خناقاتها الثلاثه مع سواق التاكسي و بياع القطايف اللي بتفك و مع الست اللي طولها متر الا ربع و طبعا ده كلامها مش كلامي
هههههههههههه
هنا بوست كان عنوانه
لا تعتب علي اعتب ع القمر
و كان البوست السابق عليه مشكله كبيره جدا
السب فيه بقي بالدين لمدون مسيحي اعجبني جدا جدا كونه مصر علي استخدام حقوقه في مناقشة قضايا اسلاميه تهمه و تتعلق بمصيره و حياته هو و غيره من المسيحيين و المسلمين في مصر لكن كان فيه ناس مصره ان لا تفهم ابدا ان النقاش شيء لا علاقة له بالدين و ممكن مسيحي يناقش مشكله اسلاميه طالما يحيا في مجتمع اسلامي و بالمثل ممكن مسلم يناقش قضايا الكنيسه لانها جزء من الوطن و سلامة المجتمع الكنسي من المشاكل جزء من سلامة الوطن،،المشكله ان فيه ناس مفهمتش ده و ردت علي مشاركاته في البوست السابق بردود جارحه
و انتهت المناقشه بان غادر المدونه نهائيا


دي صورة مينا او الحاج جرجس سابقا و مدونته القديمه كفايه حرام و الجديده مراقب مصري
تعرفت عليه عند سوسه و تعرفت علي شهروزه و حفصه و غيرها كتير من المدونين المتميزين و الذين صاروا جزء من حياتي الان باعتبارهم اصدقاء حقيقيين و من هنا بدات زيارته هو في مدونته و تعرفت علي اخرين مثل زنزانه و توتا


هذه هي الصوره التي صاحبت البوست الداهيه
روقه الجن اول الغيث قطره
وكان عن تصريحات روقه في موضوع الحجاب
و كان هذا الموضوع من شدة سخونته قد حصل علي اكبر عدد من التعليقات بلغت 134 تعليق كلها كانت حوار ساخن جدا تخلله مشاكسه و سب و تطاول من بعض المدونين ضد جرجس
و كان في تقديري افضل بوست في المدونات العربيه علي الاطلاق لما تخلله من مراجعات فكريه و ما اسفر عنه من توضيح لخلل فكري حقيقي في بنية ثقافتنا الشعبيه انا انشات مدونتي بتاريخ 6 اكتوبر الماضي و كان اول تعليق لي عند سوسه علي موضوع
كلنا ليلي ...الاشاره حمرا
و علقت مرتين مره اوضحت رايي و مره اخري اوضحت اتفاقي مع الحاج جرجس و هذا هما التعليقان

التعليق الاول عند سوسه
يوم 13 اكتوبر
انا اعتقد ان الانسان المصري عامة مهان و مضطهد وغير مؤتمن علي المسؤليه من قبل الحكومه المستبده و ان اي تحرير يجب ان يكون تحرير الشعب من الاستبداد.لان الاستبداد باختصار هو سبب كل المشكلات او هو القاسم المشترك بينها كلها والمؤلفين الذين كتبوا عن خطر الاستبداد كثيرين و الكل اجمع علي ان الاستبداد خطر علي الروح نفسها.انا نفسي قرات كتاب الكواكبي المشهور والذي اكد فيه ان الاستبداد خطر علي الحريه العقليه وانه سبب الفقر و الظلم عامةممكن لمن يرغب العوده الي كتاب الكواكبي او كتاب الاسلام و الاستبداد السياسي للشيخ الغزالي اما بخصوص قضية المراه و موقف الاسلام منها فكتاب قضايا المراه بين التقاليد الراكده و الوافده للشيخ الغزالي يوضح الكثير من الاشكالات

التعليق الثاني لي عند سوسه في نفس اليوم
بالنسبه لكلام reformer1976فانا اؤيد رايه لان بلادنا فعلا في حاجه لتغيير كل شيء واخشي ان يكون الانسان

المصري نفسه مطلوب تغييره
و طبعا الرد موصلش ابدا لاني كنت باكتب تعليقاتي متاخر لكن بعد كده حرصت اني اكون اول من يكتب تعليق
و هذا كان اول رد من سوسه علي ذو النون و كان عن بوست بعنوان ليه و هو عن احداث التحرش المعروفه في العيد و كان يوم 31 اكتوبر

الحادثة بتاع العاتبة اكيد كانوا بينفخوا فيها للتغطية على احداث أخرى كنت بتحصل ساعتهانظرية عصا موسى عارفها؟انت على فكرة جيت تكحلها عميتهاعااااادل اماااام يعمل فيلم ضد التحرشامال مين يعمل فيلم يشجعه؟؟؟؟؟

...................
كلمه اخيره
لو اصبح للتدوين المصري تاريخ كما للازاعه و التليفزيون تاريخ لاعتبرت بلا ادني مبالغه ان سوسه المفروسه رائده من رائدات العمل التدويني في مصر
تحيه لسوسه المفروسه في اول عيد ميلاد
كل سنه و انتي طيبه
ذو النون المصري

هناك 38 تعليقًا:

حفصة يقول...

اعتقد اني عمري ما انقطعت عنك و حتى لما كنت اغيب شوية كنت ارجع اقرا البوستات كلها بتعليقاتها
و الغريبة حسب ما اتذكر اني عمري ما شفت سوسة معلقة عندك او حتى في الشات بوكس اللي بره

يا ترى ليه؟؟

على العموم جهد و ذوق منك و مشكور عليه
انا اخر مرة علقت عندها كانت في بوست تصريحات روووقة العسل
و دي كانت اخر مرة ادخل عندها لان ردها عليا كانت قمة في قلة الذوق و خالي من الادب و اعلاء كلمة الحق
و هي خسرت مننا كتير لعلمك
حتى شهروزة مبقتش تعلق عندها هي كمان لانها صدمتنا بردودها علينا و استبقاءها لناس تانية كانت ردودهم علينا قمة في السفالة و الجليطة

يا سيدي
اللي يدون يا ما يتشتم

صحيح
وصلك ايميل
انا بعته كمان مرة
لو مفتحش معاك يبقى مؤكد في حاجة غلط عندك انت شوف السرفر بتاع كفر الشيخ ماله
و على راي شهروزتي
نياهياياااييا

سلام

.:.-=- ELGaZaLy-=-.:. يقول...

السلام عليكم ورحمة الله وبركاته

هيا من الناس الى بيكتبو بخفة دم يا ذو النون وحد محترم ولزيز بجد ربنا يكرمها...

ومش مهم ان الناس تتفق على حد, المهم انك تكونش شايفة كويس ,و ذوق منك اوى يا ذو النون بج

تحياتى يا صديقى العزيز

yasmina يقول...

حلوة منك هذه اللفته الناعمة والمذكرة لاحداث عند مدونة اخرى
احييك على البوست

ابراهيم عز الدين يقول...

اشكر بجد علي تعريفك للناس علي هذه المدونة الرائعة

مصرى يقول...

شكراً على تعريفنا بالمدونة
هاتابعها
:)
و شكراً

صاحب البوابــة يقول...

حقيقة أعجبتني لفتتك الرقيقة

وتذكرك لمن له فضل عليك

تحياتي ايها الحر

مُرَاقِبْ مِصْرِي يقول...

لفتة كريمة وتأريخ جميل
بتفكرني بجبرتي بريد الأهرام اللي كان قاعد للساقطة واللاقطة في البريد وييجي آخر السنة يفند ويحلل ما جاء من رسائل

تحية لسوسة في عيدها الأول

أنا أكتر تدوينة عندها عجبتني جدا كانت تدوينة "يهدي من يشاء" التي سألت فيها أسئلة رائعة وكأنها مراجعات فكرية حقيقية وللأسف أفسد جو تلك التدوينة مجموعة من الظلاميين الذين أكدت تعليقاتهم أن كل شيء على ما يرام وأن عليها أن لا تقلق نفسها بما كان يقلقها في تلك التدوينة.

بالنسبة لتدوينة فاروق حسني وخناقاتها... فأنا أعتبر تلك التدوينة تحديدا نموذجا رائعا لطبيعة الصراع بين التنويريين الوطنيين والسلفيين الدينيين فيما يخص ليس فقط شأن غطاء الرأس بل فيما يخص قضية الوطن بأكمله... راجع من جديد أراء الإخوة الظلاميين وستجد عجب العجاب فيما يتعلق بمنهجية الفكر وأسلوب التناول وانغلاقية التوجه... هي نموذج بالفعل لما باتت عليه أحوال أمتنا المصرية من راديكالية مرعبة وأحادية مفزعة

تحية لك ولسوسة من جديد وكل سنة وهي طيبة

ذو النون المصري يقول...

حفصه
صحيح انك عمرك ما انقطعتي عني و لا عن مدونتي لكن سوسه علقت عندي يمكن ثلاث مرات اخرها في بوست اختراق لما حكيت عن كسر رجلي
اللي انا عرفته عن سوسه انها بتدون من سيبر يعني مش متاح لها النت في كل وقت و صعب علي بنت انها تتردد علي سيبر في كل وقت تريد فاللي حصل كان خارج عن ارادتها فعلا و الموضوع اعتقد انه كان اكبر منها بكتير
بالنسبه لتعليقاتها انا تقريبا في المدونات اللي بزورها لا اري لها اي تعليقات عند اي احد اطلاقا ربما بسبب موضوع السيبر و عدم اتاحة النت لها في كل وقت
انا كنت اتمني ان خناقات البوست اياه تنتهي علي خير و لم اكن اعلم انك و شهروزه مقاطعين لسوسه الا الان و اتمني ان تعيدوا جميعا تقدير الموقف لاعاده المياه لمجاريها

ذو النون المصري يقول...

الغزالي
اسعدني جدا مرورك و تعقيبك
تحياتي

ذو النون المصري يقول...

ياسمينا
اشكرك علي زوقك و تعليقك
تحياتي

ذو النون المصري يقول...

ابراهيم عز الدين
اشكرك و احييك علي اهتمامك
تحياتي

ذو النون المصري يقول...

مصري
ماشي يا سيدي
تابع و قول رايك
تحياتي

ذو النون المصري يقول...

صاحب البوابه
اشكرك علي كلماتك الرقيقه
ايها الحر
تحياتي

ذو النون المصري يقول...

المراقب المصري
يااااااااااسلاااااااام يا باشا
ايه الخطوه العزيزه دي
مش كنت تقول انك جاي كنت عملت زينه مخصوص في المدونه و علي ناصية شارع مدوناتنا
و للا كنت فرشت ارض المدونه ورد؟؟؟؟
انا سعيد جدا بهذه الزياره
و فعلا بوست فاروق حسني رغم عمق النقاش و روعته و كشفه عن الغطاء الفكري للكثير و لقناعات الكثير من المدونين الفكريه
الا انه احزنني بشده ان ينتهي علي هذه الصوره المفزعه من التشدد لدرجة سب الاديان
انا احييك علي وقفتك هناك ايامها و متتخيلش انا سعيد قد ايه بزيارتك العزيزه
تحياتي القلبيه

soosa el-mafroosa يقول...

طب أنا اعمل ايه دلوقتي يعني؟؟

بجد بجد بجد..عمر ما حد أحرجني بذوقه بالطريقة دي ..مش هتصدق لو قلتلك ان ده من أسعد أيامي التدوينية إن لم تكن أسعدها على الإطلاق

أنا هاين عليا أقوم حالا أنط من البلكونة

والا بلاش خليها لما أروح لندن أحسن
:)
بوست بحاله عشان عيد ميلاد المدونة؟"فينك يا امي تشوفي الهنا اللي انا فيه"..ماحدش عملهالي قبل كده و بجد بجد أخجلتم تواضعنا

و أكتر ما أسعدني هو ملاحظتك للصور المصاحبة للتدوينات..ماعندكش فكرة أنا في أحيان كتيرة باقعد بالساعات أدعبس عليها لحد مالاقي صورة مختلفة و معبرة ..هاموت من السعادة انها فارقة مع حد فعلا

صدقني رغم ان ساعات كتير الظروف مابتسمحش اكون متواجده في تعليقات على مدونات كتير

لكني بالفعل باعتبرك أخ ليا و من أكتر الناس اللي باحترمها في هذا المجتمع التدويني

أدام الله الود

soosa el-mafroosa يقول...

بالنسبة للأخت حفصة و الأخت شهروزة

أنا مش عايزة أشهد حد لأن ربنا شاهد قبل الجميع ..و الكل عارف ان سوسة عمرها ما اهانت حد في مدونتها أبدا أبدا

أنا مذهولة جدا من تعبير

ردها عليا كانت قمة في قلة الذوق و خالي من الادب


اللي هيا مستعملاه و خلتني رجعت للتعليقات و قريتها و منهم تعليقها و تعليقات شهروزة و ردي عليهم وردي كن كالآتي


حفصه
اللي فلت منها برضه كلام كتير يا ريتها كانت فكرت شوية قبل ماتكتبه

شهروزة
علقت بموضوعية و ما أهانتش حد و استفزتوها و خلتوها تطلع كل اللي عندها

مع انكوا كلكوا قريتوا البوست و انا قلت فيه مش هناقش فرضية الحجاب عشان كنت متوقعة خناقتكم دي

و بعدين انتوا أنتوا عملتوا بالظبط اللي الحكومة كانت عايزاه ..انشغلنا عن القضية الأساسية و هي اننا نعرف الحكومة بترقد لإيه و بتداري عليه بالموضوع ده

و برضوا انشغلنا بالحجاب..نحطوا والا نشيله ولو حطناه هيقدم والا ياخر



كل واحد فيكوا قال كل اللي في نفسه و رد على كلام غيره اللي ماعجبوش و مش شايفه داعي اعلق على كومنتات الخناقة

لنها أولا ماكانتش موجهة ليا
ثانيا ماكانتش بتتكلم في موضوع البوست
ثالثا ...بصراحة مش عارفه أقول ايه..انتوا قولتوا كل حاجه تقريبا و كل وجهات النظر و ماعنديش حاجه جديده أقولها

الي اللقاء في خناقات أخرى


حد لو سمحتوا يقوللي فين قلة الذوق و الخلو من الأدب اللي هيا بتتكلم عليه؟

soosa el-mafroosa يقول...

شكري أيضا موجه ل

مراقب مصري

مش عارف أنا اتضايقت أد ايه لما انقطعت عن الحضور للمدونةو دلوقتي أد إيه أنا سعيدة بتهنئتك اللي بتدل على أد ايه إنت إنسان ذوق و محترم

تحياتي

مُرَاقِبْ مِصْرِي يقول...

يا ست سوسة إنتي تستاهلي كل خير وأنا كنت باتابع مدونتك من آن لآخر حتى لو ما كنتش باعلق... وأعتقد إن كلنا بنتعلم على مدار الوقت وبنكتسب خبرات من التجارب المختلفة التي نمر بها... تجربة التدوين في بلادنا من التجارب اللي أنا مهتم بيها جدا ومديها من وقتي ومجهودي... أنا مقتنع إن تجربتنا التدوينية بتنضج وتكبر وبتاخد مكانها بشكل رائع... خبراتنا كلنا المشتركة كمجتمع مدونين بتنمي التجربة التدوينية بشكل عام وبتخرجنا من طور المراهقة إلى طور النضوج

تحياتي من جديد وكل سنة وانتي طيبة
وشكرا للعزيز ذو النون على احتفاليته الجميلة بعيد ميلاد مدونتك

HafSSa يقول...

ما هو يا اخت سوسة لما انت تقولي يا ريت اكون فكرت قبل ما اكتب ده معناها اني مش بفكر و مش عارفة انا بقول ايه
ده غير ان في ناس شتمتني و في عرضي و شرفي و انتي مقلتيش عليهم كلمة واحدة و لا غلطتيهم بكلمة و لا اي شئ و اذا انا اتهنت في بيتك و انتي متردليش كرامتي يبقى الاحسن اني امشي

و شكرا و كل سنة و انت طيبة

ibn nasser - ابن ناصر يقول...

بوست جميل وكل سه وهي طيبه

ذو النون المصري يقول...

سوسه المفروسه
خطوه عزيزه يا ست سوسه هانم
متعمليش حاجه خالص احنا طبعا رغم اننا لم يري احدنا الاخر في عالم المدونين لكن ما بيننا يفوق ما بين الاصدقاء العاديين و انا ايضا بالفعل باعتبرك اخت و يهمني تماما امرك و باحزن اذا اصاب مدونتك مكروه او عاب اي حد فيها او قل ادبه كانها مدونتي و اكتر
ادام الله الود

ذو النون المصري يقول...

سوسه المفروسه تاني
ياريت الكلام ده تقراه شهروزه و حفصه جايز نحل الاشكال
و بعدين قوليلي
ملاحظتك الجامده دي عن رمي روحك من البلكونه
اشمعني لندن؟؟؟؟
اكيد فيها ان
قصدي حكايه مروان بتاع لندن
اكيد انتي بتنمري علي دي
ملاحظه ممتازه
تحياتي

ذو النون المصري يقول...

سوسه تالت مره
ما هي فرصه بقي !!!!!؟؟؟؟؟؟؟؟؟؟
الحاج جرجس سابقا و مراقب مصري حاليا من الناس المحترمين جدا جدا جدا و الواحد فعلا و الله نفسي اتعرف بيه عن قرب قصدي نتقابل لانه فعلا يعتبر من اخر الرجال المحترمين و من اشد الناس اللي بحرص علي مودتهم و صداقتهم لانه وطني مخلص

ذو النون المصري يقول...

مراقب مصري باشا
طبعا الست سوسه فعلا تستاهل و باتمني ان اي خلافات تتحل و نعترف انها تجربه في طور المراهقه
بقول ايه
تيجوا نعمل قاضي المدونات لحل هذه الخلافات
مدونه نشوف قاضي او محامي كبير يعملها و ننشيء لنا قوانيننا الخاصه بالتدوين الخ
بالنسبه للشكر فانا اشكرك من ناحيتي لزوقك و حرصك علي التعليق علي هذا البوست في هذه الاحتفاليه
لكن مقولتليش
مش ناوي تعمل احتفاليه انت كمان لكفايه حرام؟

ذو النون المصري يقول...

حفصه
انا راجعت تعليقك و تعليقات الناس اللي ردوا علي تعليقك
و تحديدا كان عن الحجاب و من كن يرتدينه من العرب قديما و ارتباطه بسمعتهن السلبيه
انا شايف ان سوسه جايز كان قصدها ان الكلام غالبا هو الذي اتاح الفرصه للمترصدين و للمتصيدين في الماء العكر ان يقولوا ما قالوا
لانهم اصطادوا من كلامك كلام اهانوكي به
اما عن اهانتك فهي فعلا موجوده و الموضوع و سخونته كان صعب انه يتفك بسهوله او بامان
اتمني ان تعود المياه لمجاريها و ان ييسر الله سبل اصلاح ذات البين
تحياتي

ذو النون المصري يقول...

ابن ناصر
اشكر لك مرورك الكريم
تحياتي لك

مُرَاقِبْ مِصْرِي يقول...

تصدق إنها فكرة نعمل الذكرى السنوية للمرحوم الحاج جرجس طيب الله ثراه وخصوصا إن الذكرى قربت وطبعا الذكرى تنفع المؤمنين

نهارك إشطة

ذو النون المصري يقول...

مراقب مصري
ليه خليت الحاج جرجس مرحوم؟
دا المفروض تعيد تشغيله حتي لو كانت لاغراض اخري غير السياسه ممكن تكتب في كفايه حرام حاجه تانيه
و لو مصر علي الاحتفاليه ياريت نعملها و كلنا هنيجي نحتفل بيه هناك
ياريت تفكر فيها
هي في شهر اغسطس مش كده؟
باقي من الزمن شهر كامل
تحياتي

فارس عبدالفتاح يقول...

شكرا لك اخ ذي النون المصري

ذو النون المصري يقول...

فارس عبد الفتاح
خطوه عزيزه يا سيد فارس
تحياتي لك و اشكرك علي الزياره الكريمه

Xee يقول...

العزيز جدا ذو النون

شكرا للبوست الجميل ده و الدال على أصالة و ذوق كاتبه

و شكرا ليك عشان عرفتنا بمدونة جميلة زي مدونة سوسة

تحياتي

شـــــهــــروزة يقول...

بالنسبة ليا فعلا سوسة المفروسة من افضل المدونات اللى قريتها
لكنى بالفعل أخدت موقف من التعليق او التفاعل معاها بعد الموقف اللى حصل فى بوست فاروق حسنى

لسبب واحد
عدم حيادية سوسة فى الردود على المعلقين

أو ربما كانت عاوزة تحتفظ بقاعدة شعبية وسط المعلقين اللى رأيهم كان الغالب طبعا واحنا اللى نشاز او ضد التيار
ومحتمل هى شافت انها مش حتخسر عشرين مثلا علشان خاطر تلاتة او اربعة
حتى ولو من باب احترام وجهة النظر الأخرى
دة احتمال والله أعلم

على الأقل لم تمنع أحد من سب زوارها واهانتهم فى مكانها كما أفعل أنا على الأقل حفظا لحدود كل واحد
وحفظا لمكانة صاحب المدونة
دة اللى منعنى من التفاعل مع المدونة او زوارها
لكن انا بأقرالها فعلا لحد دلوقتى
ولسة موجودة فى المفضلات بتاعتى لحد اللحظة دى

وعلى فكرة احنا وهى اتكلمنا تقريبا بسرعة عالسريع جدا كدة فى المسنجر من فترة ومش شفتها تانى بعدها يبدو للأسباب اللى انت قلتها عن توافر الانترنت وكدة
ودة كان بعد الموقف السابق

يعنى على الصعيد الشخصى مفيش بالنسبة لى مشكلة

لكن على الصعيد التدوينى او التفاعلى
لسة محتفظة بموقفى لحد اللحظة دى

شـــــهــــروزة يقول...

شوفت بقا؟؟
نسيت من لخبطتى


كل سنة وانتى طبية يا سوسة على سنوية المدونة

انتم السابقون ونحن بكى لاحقون
أنا اكتشفت اننا تقريبا دفعة تدوينية واحدة
واغلب المدونين الموجودين دلوقتى
بدأنا تقريبا فى وقت متقارب جداااا

عقبال اليوبيل الخشبى

شـــــهــــروزة يقول...

عاجل الى حفصة


سيرفر كفر الشيخ يا اؤختشى عالم تسعتاشر

يعنى لو مفتحش مع نون اى حاجة

يبقا يروح سيبر فى كينيا ولا تنزانيا
سرعتهم هناك أحسن ألف مرة من هنا

نيااهااهااااا

ذو النون المصري يقول...

xee
اشكرك جدا يا سيد زياد علي الزياره و تعليقك الزوق
تحياتي

ذو النون المصري يقول...

شهروزه
ارجو ان تكون العلاقات مع سوسه علي ما يرام و انا سعيد انكم بتتكلموا مع بعض و ارجو ايضا ان يعود التفاعل مع مدونة سوسه كما كان في الماضي
و اكيد التهنئه وصلت لصاحبتها الان و ارجو ان تكون منك علي مدونتها
بالنسبه للنت في كفر الشيخ انا شايف انه بيتقدم
هههههه
بيتقدم فعلا
البلد حدانا بقت كلها مدخله نت لكنه كله تقريبا للشات فقط
الناس هنا متعرفش نت غير انه شات و بس
و يمكن ده من اسباب تخلفه عندنا
لانه لو كان لناس بتعمل بحوث و مثقفين و كده
اكيد كانت الخدمه هتكون احسن
اهو علي كل حال احسن من مفيش
............
انا لا اعتقد ان سوسه اعتبرتنا نشاذ في وسط القاعده الجماهيريه الاكبر فاحتفظت بالقاعده في ردودها
انا شايف ان الموضوع كان كبير و هي اعتبرت في الردود ان كل الكلام اتقال
لانها قالت انتوا قلتوا كل شيء و عرضتم كل الاراء .........الخ
.........
عموما ربنا يقدم لنا كلنا ما فيه الخير
تحياتي

شيماء الجيزى يقول...

العزيز دو النون

اعتقد ان جهدك هذا يعد ميثاق يجب ان نوثقه فى ديوان عام التدوين ...على انه ميثاق كبير جدا يعيد امجاد التدوين العظيمه

صدقنى
سيأتى اليوم الذى يذكر فيه اوائل المدونون على انهم ممن حفروا هذا التاريخ العظيم

تحياتى لمجهودك الجميل جدا

ذو النون المصري يقول...

شيماء الجيزي
انا سعيد جدا بهذه الزياره و هذا الراي في موضوع توثيق المدونات
و تعبيرك عن ان جيلنا سيكون اول من حفر مسار التدوين في العالم العربي اسعدني جدا جدا فعلا حسسني بان لي دور مهم سوف يذكر في المستقبل و انا حريص علي ان يذكر هذا الدور و اتمني ان يكون جهدي اكبر من ذلك حتي يحدث ما اتمني و ارجو ان نكون جميعا من الاوائل في هذا العالم
تحياتي