الأحد، مارس ٠٤، ٢٠٠٧

تاج من مبرمج حر

تاج من صديقي العزيز مبرمج حر
................................................
ارسل لي الصديق مبرمج حر تاج جديد اسعدتني جدا اجاباته عليه لانه اظهر من خفة الظل ما يضفي علي الاجابات روح خاصه اتمني ان يكون في اجاباتي ما يقاربها .و يعتبر هذا التاج هو الثالث لي في رحلتي التدوينيه منهم اثنان من مبرمج حر وواحد من حفصوتشا ام مصطفيتش .
......................................................
اسم مدونتك؟
ذو النون المصري
لماذا اخترته؟..ماذا تقصد به؟
في البدايه حينما احببت ان انشيء مدونه كان تفكيري منصبا علي اسم يدل علي شخصية صاحبها الكامله ما امكن،ففكرت من فوري في اتخاذ اسم فرعوني و هو ما كان بالفعل ففكرت في اخناتون لكني فوجئت بانه اسم مستهلك فهناك من وجدته يتخذ نفس الاسم فصرفت نظري عن اخناتون و كنت حزين لفوات فرصة حمل هذا الاسم العظيم،ثم بدات في التفكير في اسم ابن النيل و للاسف ايضا وجدت نفس الاسم موجود لدي مدون اخر بخلاف انني فعلا انشئت مدونه يوم خمسه اكتوبر الماضي بهذا الاسم_ابن النيل_لكنها سقطت في نفس اليوم و لم اتمكن من الكتابه فيها .وفي النهايه استقر رايي ان انشئها باسم ذو النون المصري لكن لماذا اخترت هذا الاسم بالذات؟؟؟؟
انا فكرت في اسم يدل علي شخصيتي القوميه كمواطن مصري مع اثبات ديانتي الاسلاميه في الاسم ايضا ،دون ان يغفل الاسم في نفس الوقت ميولي نحو التيار الصوفي فكان خير تمثيل لشخصيتي هو هذا الاسم العظيم جدا جدا جدا و الذي اعتز بانه انسان مصري هذا الاسم هو ذو النون المصري الانسان الصوفي العظيم و الذي كان له من عظم الشان في عصره ان انفرد ببعض العلوم كعلم اللغه المصريه القديمه و كان له من تفتح الزهن و سعة الصدر ما شهد له به معاصروه
هل فكرت في اغلاق المدونه؟
طبعا مستحيل ياتي الي زهني هذا الخاطر ابدا لاني خلاص اصبحت مدمن تدوين و تقريبا لا اغيب عن مدونتي يوم كامل دون ان اطلع عليها و للتدوين فضل كبير جدا علي لاني من خلاله عرفت افضل اصدقائي الذين لم اراهم حتي الان
صورتك في المدونه ..رمزيتها؟
حتي الان لم اقم باختيار صوره مناسبه للمدونه و قد حاولت وضع صور اعجبتني لكن للاسف لم اتمكن من وضعها حتي الان،،لكن الصديق الحاج جرجس اختار لي صوره كانت علي بوست قديم عندي و انا معجب بها لانها فعلا صوره بديعه مش بديعه مصابني الرقاصه !!!و لا بديعه التانيه !!!لا لا لا بديعه اللي انا قصدي عليها واحده تانيه خالص مش هتعرفوها انا و جرجس بس اللي نعرفه ههههههههههههههههههه
المهم..الصوره عباره عن هيكل عظمي مكشوف تشرق عليه الشمس فيبدا في القيام هذا هو مضمون الصوره و اعتقد ان لها رمزيه واضحه
طبيعة كتابتك في المدونه بشكل عام؟
كتاباتي بشكل عام هي مختصرات كتب قراتها فاعجبتني فاحب ان اقدم موجزها للقراء كي يشاركوني الاستفاده منها و احيانا اخري اكتب تحليلات لواقعنا الاجتماعي
لماذا تدون اصلا؟
للتدوين فوائد كبيره جدا للفرد و المجتمع فهو من ناحيه وسيله من وسائل نشر الخير و جمع الحسنات و الدعوه الي الخير لمن يحب ان يمشي و يعمل في هذا الطريق ..و هو وسيلة معارضه و تغليس سياسي لمن يهوي العمل السياسي ..وهو وسيلة فضفضه لمن يحب الفضفضه!!باختصار التدوين يمثل اشياء كثيره جدا فهو بالنسبه لي فرصه للالتقاء بالطيور التي اشاكلها و تشبهني و هو فرصه لاتزود بخبرات الاكبر مني و فرصتي لنقل خبراتي للاخرين.و يمكنني القول الان ....انا ادون اذن انا موجود ..و كنت في حوار مع الحاج جرجس فقلت في جملة كلامي له ....اصبح الان عندي مدونه لان المدونه الان هي بندقية الامس معك مدونه اذن معك سلاح
احلي جمله قيلت لك في وصف مدونتك؟
فاكر ان فيه مدونه اسمها لحظة صدق قالت لي بعد ان قرات بعض مختصرات كتبي شيء جميل ان تكتب خلاصة قراءاتك للناس هذه كانت افضل كلمه قيلت لي في وصف مدونتي فقد اشعرتني باهمية ما افعل
التعليقات بالنسبه لك ...اهميتها؟
التعليقات هامه جدا بالنسبه لي رغم اني حينما انشئت المدونه في بداياتي لم اكن اعباء بالتعليقات اصلا ،لكنها في مرحله تاليه صارت هامه لاني اولا احب ان اعرف مدي اهمية ما اكتبه لدي الزملاء و اراءهم عباره عن بوصلة توجيه لما يهتمون به كما تعتبر التعليقات وسيله للاطمئنان علي وجود روابط مع الزملاء الذين صارت تربطني بهم صداقه حقيقيه
افضل بوست كتبته؟
صراحة ليس من السهل ان اجيب لان بعض ما اكتبه عباره عن مختصرات كتب فمن اهم الكتب التي اختصرتها هنا كتاب الدين والفكر و السياسه من تاليف صلاح قنصوه و كتاب ادارة المعرفه و الابداع المجتمعي من تاليف محمد رؤوف حامد و الكتابان من اروع ما قرات طوال العام الماضي و ربما في السنوات الخمسه الماضيه دون مبالغه ..بالنسبه لما اكتبه انا من تحليلات اجتماعيه و ملاحظات فلسفيه فهناك بوست بعنوان مئذنة المسجد فانا اعتز به كثيرا.....اما بخصوص اللينك فللاسف انا لم افكر في التعرف علي كيفية عمل اللنك في نص الكلام حتي الان فاذا كان لديك فرصه ووقت تعرفني فاكون في غاية الشكر و العرفان لك
اما سبب كونه افضل بوست فذلك لان هذا البوست كان فيه شرح لطريق اعبره يوميا لمدرستي و هو طريق زراعي طويل اري فيه مئذنة مسجد في الفراغ تكاد تلامس السماء لانها اعلي مبني في القريه فهي تصل الارض بالسماء و ذكرت انها معلم صامت يعطي درس في المعني الحقيقي للدين و هو وصل الارض بالسماء كما ذكرت انها ملخص كل الاديان
افضل مدونه قراتها؟
الوعي المصري ....هذه المدونه هي السبب المباشر الذي لاجله انشات مدونتي لاني باختصار كنت احسد صاحبها علي جهوده و نشاطه و من حسدي انشات مدونتي ..و معلوم انه لا حسد الا في اثنتين ..فكنت في حسدي ايجابيا لا سلبيا و الحمد لله و انا سعيد جدا بهذه الصدف التي عرفت من خلالها هذه المدونه ...بعدها تعرفت علي مدونات اخري يمكنني ان اضعها في قائمة الافضل منها سوسه المفروسه ،و ايضا كفايه حرام ،و هناك زنزانه و شهروزه و بنت مصريه و الغزالي الرائع جدا و اروع مدوناتي الان هي بحب الرسم و هي في قائمة مفضلاتي لاني باختصار اجد نفسي و من يشبهوني اكثر هناك ..
افضل بوست قراته؟
صراحه ليس من السهل الاجابه علي هذا السؤال لان فيه الكثير جدا من البوستات المتميزه ...هناك مثلا عند سوسه المفروسه بتضحك علي مين ياض..و ايضا لماذا من مصلحتنا ان يتولي جمال مبارك الحكم في مصر؟؟؟هناك مثلا عند زنزانه ..اياك تهزر دي فيها نص عمرك .!!!!.و عند جرجس تقرا اهذا هو اسلامكم !!شكرا و الكثير ايضا عند وائل عباس لا استطيع الاختيار لكن في رمضان الماضي كان له بوست ظريف جدا و كتاباته عن السادات كلها غايه في التميز ..و عند حفصه فيه البوست الاخير كلنا بنحبك يا حمار
اما في مدونة بحب الرسم فتقريبا كل البوستات هناك احبها جدا و لا يمكن ان لا ياتي فيها ما لا يعجبني ..!!ممكن تجد بوست اقل من بوست لكن بوست رديء .......!!!مش ممكن
ياريت اللي يعرف اللينك بيتعمل ازاي في البوست يقول لي؟
هل خسرت صديق بسبب كتابه هنا؟
لا ..مخسرتش اي صديق ..لكن خسرت فلوس
هههههههههههههههههههههههههههههه
انا كسبت اصدقاء كثيرين جدا من خلال التدوين و هم بحق افضل الاصدقاء الذين اعتز بهم و لم تكن ستتاح لي الفرصه ان اتعرف عليهم و علي افكارهم الا من خلال التدوين
حد قل ادبه في التعليق عندك؟و ماذا كان رد فعلك؟
لم يحدث شيء من هذا علي الاطلاق في مدونتي و اعتقد انه لن يحدث
اسواء مدونه قراتها؟
المدونات السيئه كثيره جدا لكن هي سيئه حسب وجهة نظري ربما لها من يفضلها و يسعي لتتبع اخبارها و جديدها فلا اعتقد انه يحق لي وصف مدونه بانها الاسوا !!!!لانها تعتبر الافضل عند غيري الامر الاخر الاسوا في التدوين لا تقول هذا اسوا بل اتركه و اقراء ما تري انه احسن لان قراءة المدونات امر اختياري لا اكراه فيه
اسوا بوست قراته؟
هذه الاجابه متعلقه بما قبلها!!!!!!!!لاني لم اقراء اسوا بوست حتي الان !!!انا اقرا فقط ما يعجبني و طالما قراته فهو بالتاكيد اعجبني و الا ما قراته اصلا لذلك لا يوجد عندي اسوا بوست فكل ما قراته جيد لكن الجوده تختلف فهناك الجيد و هناك الاجود منه
اسواء مدون؟
ايضا تتعلق الاجابه هنا بما قبلها لان كل المدونين الذين قرات لهم ممتازين و يختلفون فقط في درجة الامتياز و التفوق..ممكن تراجع القائمه المفضله في مدونتي و تاكد بنفسك اذا مكنتش مصدق..و اتحداك ان طلعت مدونه واحده مناه سيئه طبعا هناك مدونات اخري ممتازه اتابعها لكن لا احب عمل زحمه من المفضلات في مدونتي لذلك اقراء لهم من خلال قوائم مفضلات اخرين مثل جرجس و سوسه المفروسه و الفنان حسني سليمان و غيرهم
من سارسل لهم التاج؟
سارسل التاج
لمبرمج حر .........لانه هو الذي ارسله لي .ههههههههه هو اجاب عنه قبلي.ههههههههههههه
حفصه ام مصطفيتش..............مدونتها عطلانه من حوالي شهر و نصف الشهر..........هههههه يعني مش هتجاوعليه
ابن النيل............هو ابن عمي لكن لسه معملش مدونه ...ههههه كل مايعملها تسقط و بقالنا علي الحال ده اربع مرات
ابن الازهر .............هو صاحبي ...و مدونته سقطت من حوالي شهرين و برضه مش عارفين نعمل له مدونه
الحاج جرجس........مبيجاوبش علي تيجان اصلا...............هههههههههههههههههه
...................................................................
كتبها ذو النون المصري
............................................................

هناك ٤٣ تعليقًا:

Music Gates يقول...

انا عايز اقولك اني يمكن اكون اتعقد شوية مش اني مش فاهم حاجه لا من حلاوة الكلام و كدا و مش عارف اقول ايه والله و كفاية اني اول واحد يعلق علي البوست و يمكن السؤال ده واجابته مش عارف عاجبني ليه

********* احلي جمله قيلت لك في وصف مدونتك؟
فاكر ان فيه مدونه اسمها لحظة صدق قالت لي بعد ان قرات بعض مختصرات كتبي شيء جميل ان تكتب خلاصة قراءاتك للناس هذه كانت افضل كلمه قيلت لي في وصف مدونتي فقد اشعرتني باهمية ما افعل******
بص انا محرج لاني مش لائي كلام اقوله بس هقولك بارك الله فيك

zenzana يقول...

ذو النون يا روحي
كدة متبعتليش التاج؟
ممنوع عنك العيش والحلاوة
وجاري تغريمك انك تيجي بالفسيخ لما حفصة تيجي ومفيش حد هيحوش عنك
انا عجبتني ردودك جدا
انا كنت ناوية اكتب بوست بمناسبة مرور شهرين علي بداية تدويني
وكنت هكتب فيه ما يقارب التاج
ربنا يسهل والنت عندي ف البيت يشتغل

أحمد يقول...

يا عم ذو النون
أنت اللى صديق و أنت اللى عزيز و أنت اللى غالى بجد وده كان أحساسى بيك من الأول أنك غالى بجد يا ذو النون ومتأكد كمان أن ده مش أحساسى انا لوحدى

hosnysoliman يقول...

الله عليكى العزيز والحبيب اخى شناوى جميل ورائع كعادتك..اهم ما استفادة لى من التدوين هو معرفة امثالك

محمد عـنـانـى يقول...

بعد السلام
اه الاجابات الحلوه دى انا عايز اقول انى افضل بوست بجد رائع انا قراتو وخت منو كتير لاافكارى
مزيد من التدوين مزيد من النجاح

khaled يقول...


جميل قوى ان الواحد يكشف عن شخصية تعايش معاها من خلال الكلام فقط و يتعرف عليها من التيجان
بس حاسب لان التيجان ليها ودان
ههههههههه
عزيزى ذى النون
انا جيت مدونتك النهاردة لعدة اسباب
اولا علشان اسلم عليك
ازيك؟
ثانيا علشان اقرا موضوعك و ارد عليه
وقد كان
ثالثا
محضرلك مفاجأة عندى ادخل و شوفها
رابعا
موضوع كيفية عمل اللينكات يا ريت تتابعنى

ta3leem-khaled.blogspot.com

ان شاء الله الموضوع القادم عن اللينكات
خامسا سلام

raspoutine يقول...

حبيت ادعوك لمشاركتنا اللقاء الجاى ان شاء الله




اللقاء الثالث الشهري
موعدنا فى دار الاوبراكوفى شوب الابداع - بجوار مسرح الهناجريوم الجمعة القادم الموافق9/3/2007فى تمام الساعة السادسة مساءا
الدخول من البوابه الخلفيه لدار الأوبرا أمام النادى الاهلى ثم تتجه لمسرح الهناجربعد الهناجر نجد دار الابداع الوفىالكافيه بجوار دار الابداع

ايمن فاروق

عماد رفعت يقول...

اذيك ياذونون
المجله اللي كلمتك عنها قبل كده نزلنا منها عددين
هي بتنزل كل أحد
www.shbabik.net
هستني منك الاوك في قسم المدونين في المنتدي الخاص بالموقع ونبدأ نكلم بعض عشان تشاركنا بازن الله

ibn nasser - ابن ناصر يقول...

احب اقولك يا ذو النون انك شخصيه ظريفه ومثقفه,,ومستنين منك بوستات جامده بعد التاج الجميل ده
تحياتي

شباب روش طحن يقول...

موضوع جديد أتحدث عنه علي صفحتي أتمني منك المشاركة فيه وهو يدور حول الإجابة علي هذا السؤال بماذا تفسر وجود الأديان والعقائد في تاريخ البشر؟؟؟

^ H@fSS@^ يقول...

وقع للتضامن مع كريم عامر وللدفاع عن حريتنا

http://blogger-in-jail.blogspot.com/

zo elnon, lazim ashofak lama anzil masr in sha allah elosbo3 elgai etsaraf yalla salam

غير معرف يقول...

بوست جميل جدا لك تحياتي ومفيش احسن من الصداقه

صاحب البوابــة يقول...

اجابات رائعة تناسب من عقل حر , لتسطر بحروف كلامها سياجاً يحيط ويحمي بصداقتنا المنتظرة ...

-----------------

تحياتي أخي الغالي ...

-_- يقول...

و ما زال البحث جاريا عن ضحية نرسل لها التاج

ههههههههههه

عسل يا مصري

عين ضيقة يقول...

ماشى ياعم

يارب تتهرى تاجات من الناس اللى بتحبك
يـارب

تحياتى

soosa el-mafroosa يقول...

اخجلتم تواضعنا

سعيدة ان المدونة و اللي فيها عجبينك

هو ده الكلام اللي بيخلي الواحد يبطل يأس

طالما فيه ناس محترمة زيك بتقرا و تقدر اللي باكتبه

اجاباتك كلها تتميز بالصدق الشديد

تحياتي

khaled يقول...

ذو النون
ممكن تكتب الكود فى الشات بوكس بتاعك او بتاعى فى حواديت و انا هاشوفه مش شغال ليه؟

ذو النون المصري يقول...

copa
انا فعلا سعيد بكلامك خصوصا ان هذه اول زياراتك لمدونتي اشكرك و اتمني لك التوفيق
انا زرت مدونتك قبل ما ارد عليك هنا و اعجبتني
لك تحياتي

ذو النون المصري يقول...

زنزانه
انا فعلا محرج اني نسيتك في التاجات لكن و الله مكنتش عاوز اتعب حد خصوصا ان التاجات كما قال لي احد الشباب صار ليها ودان
هههههههههههه
كل حاجه بقالها ودان و مش عارف هنفضل خايفين من الودان دي لحد امتي
عموما انا مقدرش علي فراق العيش و الحلاوه بتوع الزنزانه رغم اني عمري ما احب العيش مع الحلاوه اصلا
هههههههههههههه
تحياتي

ذو النون المصري يقول...

عزيزي مبرمج حر
انا من اسعد الناس بصحبتك و صداقتك لانك فعلا نموزج للشاب المصري المتفتح علي الثقافات الحيه
لان فيه ناس متفتحه علي ثقافات ميته طبعا!!!!!!!!!؟
لك تحياتي

ذو النون المصري يقول...

الاستاذ العزيز حسني سليمان
كلنا فعلا صحبه جميله جدا لم يكن في اعتقادي ابدا اني هتعرف بيكم
لكن و الله انتم فعلا احلي صحبه و اجمل اصدقاء
العقل و الطيبه و الثقافه العاليه هي اهم مميزات المدونين
لك خالص التحيات والموده

ذو النون المصري يقول...

محمد العناني
اشكرك جدا و اهلا بيك دائما في مدونتي

ذو النون المصري يقول...

خالد المعلم العزيز جدا
اهلا بيك
انا فعلا باسعد جدا لما بزور مدونتك و لما بتزورني
لان مدونتك لازم استفيد منها بعكس الكثير جدا مما يكتبه المدونون
الفائده في مدونتك محققه
واحد بيعلم الناس كيفية اعداد المواقع و عمل الكودات للمدونات
ممتاز جدا
انا رجعت للمفاجاه وبالطبع علقت عندك عليها قبل ما ارد عليها هنا و انا سعدت بها جدا
لك خالص الشكر و التحيه
و الي الامام

ذو النون المصري يقول...

راسبوتين
ياااااااااااااااااه
انا كنت نفسي فعلا اجي و اكون معاكم لكن فيه كام ظرف اتجمعوا و ما امكنش اني اكون عندكم اليوم
ايب هذه الظروف و للاسف ان الكمبيوتر عندي عطلان من يوم الثلاثاء و انا باكتب الرد قريت الدعوه يعني زمانكم الان بتشطبوا اللقاء و انا لسه باقراء الدعوه للاسف
شفت النحس ده!!!!!؟
انا عموما اشكرك جدا لهذه الدعوه و انشاء الله استجيب لها في الشهر القادم
علي فكره انا لست من القاهره
انا من كفر الشيخ
لكن اكيد هكون موجود
لك مني خالص الموده والتحيه

ذو النون المصري يقول...

و له نهايه
ماشي يا سيدي
كله تمام
انا لسه مشفتش المجله لكن الف مبروك مقدما
انشاء الله ازورك بعد انهاء الردود علي التعليقات
لكم جميعا تحياتي

ذو النون المصري يقول...

ابن ناصر
اشكرك وارجو ان تعجبك البوستات القادمه كلها او اكثرها
لك خالص التحيات و الموده

ذو النون المصري يقول...

مزمز
علم و سينفذ
لكم تحياتي و اتمني لكم التوفيق

ذو النون المصري يقول...

الشباب الروش الطحن
هشارك طبعا
لكن اعزروني للتاخير لان الكمبيوتر عندي كما قلت منذ قليل كان عطلان منذ ايام و عندي شغل كتير متعطل لكن اكيد هزوركم
لكم تحياتي و سعيد جدا بوجودكم في مدونتي

ذو النون المصري يقول...

حفصوتشا الغاليه جدا
عامله ايه في امريكا ياريت تكوني بخير
انا علي فكره حسيت بازمة المدون لما يعجز عن دخول مدونته بعد عطل الكمبيوتر اربع ايام فقط
انا كنت في غايه العصبيه
حاسس فعلا اني محبوس عن الناس الله اعرفهم اكثر من غيرهم انا ايضا عاوز اشوفك انتي و باقي الفرقه
لكي خالص التحيات و اتمني عودتك الي ارض الوطن سالمه

ذو النون المصري يقول...

فارس
اسعدتني جدا زيراتك و مفيش احسن من الصداقه و انا اعرف جيدا قيمتها و كنت و الله عوز اكتب عنا بوست صغير شويه لكنه اكيد مؤثر ربما يكون هو القادم
لك تحياتي

ذو النون المصري يقول...

صاحب البوابه
اشكرك جدا يا اخي
و انا اسعدتني جدا كلماتك و اتمني ان تكون كتاباتي مما يحوز اعجابكم دائما
لك تحياتي

ذو النون المصري يقول...

شارم العزيز الغالي جدا
فعلا مازال البحث جاريا عن ضحيه
انا تجنبت البحث عنها في التاج ده حتي لا اتسبب في اي حرج
ههههههههه
لك تحياتي

ذو النون المصري يقول...

عين ضيقه
انشاء الله انت و اللي يتشدد لي كمان
ههههههههههههههههه
بهزر معاك
ههههههههههه

ذو النون المصري يقول...

سوسه المفروسه
متتخيليش انا قد ايه سعيد بزيارتك لمدونتي
يا مرحبا يا مرحبا
انا لو اعرف انك جايه كنت رشيت المدونه ميه و فرشت المدخل بتاعها رمل
وورد
ايه اخبارك؟؟؟؟
كلامك جميل جدا
لازم تعرفي انك تقريبا اهم واحده في التدوين و اكتر واحده الناس بتقرالها في المدونات و الكلام الجامد عن نواياالاعتزال ده اوعي تفكري فيه اني
اسعدتني جدا زيارتك
لكي مني خالص الموده و التحيه و التقدير

ذو النون المصري يقول...

خالد
انا حاسس اني تاعبك معايا
انا كتبت الكود خلاص لكن مش عارف برضه مبيشتغلش

khaled يقول...

ذو النون
معلش
حاول مرة تانية و اتأكد من الكود الصح
حتى انسخه فى المثال و غير فيه
بس اتأكد من الاقواس و حط لينك مدونتك زى ده
http://zonoonelmasry.blogspot.com
انا طبقت هنا

ذو النون

و حاول تحط الكود على كذا سط زى سطر للشق الاول و سطر للكلمة او اسم المدونة و سطر لاقفال الكود
/a
بين علامتى اكبر و اصغر من مقفولين
معلش جرب تانى و قوللى

khaled يقول...

http://zolnoonelmasry.blogspot.com
معلش ده اللينك الصحيح لانى حطيته من غير اللام
و ده التطبيق

ذو النون

Gid-Do - جدو يقول...

ذو النون

لقيتك بتسال عن صورة الدكتور احمد عبد الله رزة عند المصرى افندى موقع بهية كتب مقالة مطولة عنة واللينك اهو
موقع بهيةـدكتور احمد عبد الله رزة تحياتى

Gid-Do - جدو يقول...

ذو النون

موقع بهية فتح فى اللينك لكن موقع المصرى افندى حيث سؤالك مفتحش ودية محاولة للتصحيح اذا مفتحش مش مهم لانك انت عارف اية اللى كتبتة
المصرى افندى

غير معرف يقول...

بعد السلام
اه يا صحبى مختفى فين بالك كتير اوى ممتعتناش بكتاباتك لا يا صحبى انا مستنى البوست الجديد بسرعه

ذو النون المصري يقول...

خالد المعلم
انا سعيد انك متابع محاولاتنا للتعلم و اشكرك جدا انا غبت شويه لان الكمبيوتر عطل تاني و النت فصل لاكثر من اسبوع فشلت فيها في الرد عليك
هجهز البوست الجديد و اعمل محاوله جديده
تحياتي

ذو النون المصري يقول...

جدو يا جدو يا احسن جدا
انا فعلا عاجز عن الشكر
تصدق اني انا نفسي نسيت السؤال و نسيت ارجع للبحث عن اجابته ؟
انا فعلا اشكرك جدا
انا هزور الموقع كي اتعرف علي هذه الشخصيه لانه من الواضح انها شخصيه ثريه للدرجه التي تستفز مدون للكتابه عنها
اشكرك جدا
مع خالص تحياتي و احتراماتي

ذو النون المصري يقول...

محمد العناني
انا سعيد جدا بسؤالك عني و انك متابع مدونتي
انا فعلا تغيبت قهرا و اجبارا بسبب اعطال النت و الكمبيوتر لكن الحمد لله
انا بجهز البوست الجديد حاليا
لك تحياتي