الثلاثاء، يوليو 01، 2008

البنت الصغيره



و انا في سن ست سنوات و كنت في اولي ابتدائي انجبت امي لنا اخت صغيره.كنت انا و اختي الكبيره و احنا في طريقنا للمدرسه صباحا و طبعا كنا دايما مستعجلين لاننا عمرنا في سنوات الدراسه ماروحنا المدرسه بدري،كنا بنتكلم دايما عنها.و كان اسمها البنت الصغيره.اقول البنت الصغيره راحت،البنت الصغيره امبارح و انا شايلها عملتها عليا،و نضحك و هي تحكي ما فعلته البنت الصغيره لما شالتها اليوم الماضي،و تحكي و تقول البنت الصغيره عيطتت و حاولت اسكتها مره و التانيه و العاشره و هي ابدا و كانها حالفه ما تسكت الا اذا امها رضعتها .و ارجع اتكلم انا عن البنت الصغيره اللي لسه ما اختارنا لهاش اسمو احكي و اختي تحكي لحد ما نوصل للمدرسه

و احنا راجعين من المدرسه برضه كلامنا كله كان عن البنت الصغيره ،و اللي هنعمله معاها انهارده لما نرجع البيت و اقول لاختي مش هشيلها و احطها علي رجلي الا اذا فرشت تحتها مشمع علشان متعملهاش عليا تاني لانها وسخت لي كل هدومي و نضحك كلنا

المهم الزمن بيمر و البنت الصغيره بعد ايام اختارنا لها اسم مني و مني بتكبر زيها زي غيرها و اتعلمت المشي و في اوائل تعلمها المشي فاكر انها كانت بتلبس زنط او زعبوط من نوع قديم كان طويل بطولها كله و كانت قماشته من نوع ناشف مش لين فكان بيرقص معاها في حركتها و جريها و هروبها مني بعد ما تضرب ضربتها علي ضهري او ترمي جزمتها في وشي او تدلق لي كباية الشاي و كنت اضحك جدا من منظرها و كل اللي شافوها كانوا بيضحكوا منها

كبرت البنت الصغيره اللي هي مني ،و دخلت المدارس من ابتدائيه لاعداديه لثانويه قسم ادبي.و كانت في الثانويه نموزج للدماغ المشيع و اللي ضاربها طبنجه خالص!!! يعني كل مذاكرتها كانت قدام التليفزيون و اغلب وقتها نوم و كان ابويا بيشد في شعره منها لقلة مذاكرتها و كان حاسس انها هتجيب مجموع في الارض او كان خايف لتقع خالص ،لكنها مع احتوائها لتناقضات مفجعه نجحت و بمجموع زاد عني بعشره في الميه او اتناشررغم اني كنت مبنامش اصلا و مبشفش التليفزيون ايام المذاكره علشان اركز

المهم البنت الصغيره دخلت كلية تربيه اساسي عربي رغم انها صفر في اللغه و حصلت علي المقبول في كل سنواتها مع قلق الاب المستمر لقلة مذاكرتها لكنها اجتازت كل سنواتها و انهت دراستها،و دخلت معي معهد الخطوط العربيه و خلصت في اربع سنوات رافقتها في ايام الامتحانات رايح جاي رغم غلاستها في المشي لما بتمشي معايا

اتخطبت البنت الصغيره من شهور و اتحدد موعد دخلتها باول شهر يوليو ،و لو كنت املك جهاز بطل فيلم كليك الشهير لجعلت الزمن يتباطا حتي لا ياتي هذا اليوم ابداو خلاص كل شيء تم و حنتها كانت امس و دخلتها اليوم بعد سنها ما بقي اتنين و عشرين و لسه البنت بنت صغيره
..................
تحديث
في حفل الزفاف امس بجوار حمام سباحة استاد رياضي كفر الشيخ اعلن مقدم الحفل اسم العروسين و قال بنبارك اليوم لبرنسيسة حفل اليوم الانسه مني (البنت الصغيره)؟
.............................
تابعوا ما ندونه علي مدونتنا فنون جميله و مدونتنا الاخري فلسفة حياة
اللوحه لفنان لا اذكره
......................

هناك 20 تعليقًا:

شمس الدين يقول...

دي سنت الحياة ببساطة !!!

فكرني سردك البسيط بقصة حديث الصباح و المساء و الذي يصور بشكل رائع ابجديات الحياة من ميلاد و زواج ووفاه فقط هاكذا !!!

بكرة البنت الصغيرة تجيب بنت تانية صغيرة و تشاهد نفس ا لقصة تتكرر و لكن لن ترقبها بقرب بثلما فعلت مع البنت الصغيرة ام البنت الصغيرة

سرد بسيط و جميل

احلام اليقظة يقول...

احلى ما فى القصة هو احساسك بأختك
عالى قوى
احساس حانى مترقب
مبروك ليها
احترامى

بنت القمر يقول...

حب... وحنان ولكن غيره خفيه تطل بين السطور... تحاول اخفاءها.. بذكاء ..
مبروك وعقبالك

نعكشة يقول...

ألف مبروك ليها

بارك الله لهما و بارك عليهما و جمع بينهما في خير


اتمني لها كل السعادة و الذرية لاصالحةة

ماشاء الله
انتو كنتوا ومازلتوا اخوات حلوين قوي
ربنا يخليكوا لبعض

دمتوا سالمين

سلامون عليك

جنّي يقول...

ألف مبارك للعروسين ..

قالوا قل مبارك ولا تقل مبروك لأنها من برك البعير ..

وقالو قل العروس ولا تقل العريس أو العروسة ..

ونقول لك عقبالك ( العاقبة لك ) .. أم إنك متزوج ؟

سلامون من نعكشة .. أليس من الأفضل سلامون وسردين ؟!!!!!!!

HafSSa يقول...

رولولوللولليليليليييييييييييي

الف الف مبروك للبنت الصغيرة
و الف الف مبروك لاخو البنت الصغيرة
اسلوبك يا نون في السرد جميل جدا
انا فعلا باستمتع باي شئ تكتبه بالذات في الحاجات الانسانية دي
بجد اسلوب سردي عظيم

وعود احمد من بعد غياب قصير


تحياتي

جـيـداء يقول...

كلامك فعلا خلانى اتخيل مشاهد قدامى ليكم و انتوا صغيرين و لما كبرتوا..
بتخيل حكايتك زى فيلم اوله ابيض و اسود و اخره الوان..

ربنا يخليكم لبعض و تفضلوا حنينين و قلبكم على بعض دايما..
الاخوات الكويسين نعمة و سند فى زمننا ده :)

نور فريد يقول...

جعله الله زواج مبارك
وعقبال ماتكون خال لبنت صغيره امها هيا البنت الصغيره

ورود و أشواك يقول...

ألف ألف مبروك لمنى
و يارب حياتها كلها تكون مشرقة و سعيدة ...
سردك جميل اوى .. حسيت كإن شريط فيلم بيجرى ادامى و بيسابق خطوات الزمن فى صمود
منتهى الروعة فى اختصار الأيام فى 5 دقايق قريت فيهم البوست الجميل ده و حسيت بكل مراحل حياة البنت الصغيرة
ربنا يباركلها و تجيبلكوا بنت صغيرة تانية و تحكى عنها مع صحابك فى الشغل لحد ما تكبر و تتجوز و تشوف ولادها كمان


على فكرة مدوناتك ال 3 أحلى من بعض فيهم نغمة راقية و احساس كلاسيكى و ألوان صافية
يمكن لأن اختياراتك للوح فى منتهى النعومة و التناسق, يمكن لأنك بتكتب بعقلك و بقلبك مع بعض و ده شىء محسوس جدا , يمكن لأناقة الصفحة

بأى شكل من الأشكال بحييك على زوقك


كل تقديرى

أمل فتحى عزت يقول...

حملة لرد الاعتبار
........................
حيوا معى العين الساهرة للحفاظ على المقدسات وعودة الحق لأصحابه عندما أعاد الدكتور/أسامة السعداوى صياغة التاريخ المصرى القديم لقد نصر العالم الجليل تراث الاجداد وقدمه للآحفاد لينهلوا العلم من أوسع أبوابه تعالوا يا أبناء مصر

نطرق باب النابغةالدكتور /أسامة السعداوى لنعرف منه الحقيقة


قودوا معى حملة الشرف والكرامة فى رفع الظلم عن أجدادكم وانتم أصحاب كلمة فلتكن فى موضعها فلا استقامة للمستقبل الا بتصحيح مسار تاريخنا واحياء علومنا وحضارتنا


ادخلوا الموقع الخاص بالعالم من على صفحة مدونتى الرئيسية
ولكم منى جزيل الشكر

ذو النون المصري يقول...

شمس الدين
انا كتبت بتلقائيه فجاءت شبيهه بحديث الصباح و المساء
الظاهر ان نجيب محفوظ كان بيكتب بتلقائيه شديده
تحياتي

ذو النون المصري يقول...

احلام يقظه
اشكرك جداعلي التعليق و علي كلماتك
انا سعيد جدا بها
تحياتي

ذو النون المصري يقول...

بنت القمر
الله يبارك فيكي
اشكرك جدا
تحياتي

ذو النون المصري يقول...

نعكشه
اشكرك جدا
و سعيد بتعليقك
تحياتي

ذو النون المصري يقول...

جني
لسه مش متزوج
و اشكرك علي معلوماتك
نعكشه وقع في خطا مطبعي بس مش اكتر
تحياتي

ذو النون المصري يقول...

حفصه
و انا فعلا باستريح في الكتابات الشخصيه رغم اني اول ما بدات التدوين كنت بافكر اكتب في ملخصات الكتب فقط
تحياتي

ذو النون المصري يقول...

جيداء
و ربنا يديم عليكي نعمه
اشكرك جدا
تحياتي

ذو النون المصري يقول...

نور فريد
بارك الله للجميع
اشكرك جدا
تحياتي

ذو النون المصري يقول...

ورود و اشواك
كتبتي كلام كتير عني مش عارف ارد عليه بايه لكن انا فعلا سعيد و باسعد لما الاقي كتاباتي بتعجب حد
اشكرك جدا
تحياتي

ذو النون المصري يقول...

امل فتحي عزت
و الله انا سعدت جدا بالوصول لمعلومات عن هذه الشخصيه ووعد بالاطلاع علي انجازاته
اشكرك جدا
تحياتي