الخميس، أغسطس 02، 2007

النت في بلدنا


النت حدانا في البلد قاطع بقاله يجي شهر و قليل ما بيجي و يشتغل زي اي نت عند بقية مخاليق ربنا، حتي انه بقي عامل زي مية الشرب في حتت تانيه بيشتغل قبل الفجر بس!!!؟ .كانت شبكة نت واحده حدانا في البلد و كنا مرتاحين ،لكن فيه واحد تاني نوي يعمل شبكه تانيه و ده اللي خلي صاحب النت الاولاني اللي احنا مشتركين عنده يعلنها في صيحه مدويه انه سوف يخفض الاشتراك و ينزل سرعات زياده و يقدم دورات ويندوز مجانيه للمشتركين و دورات اخري باسعار خاصه لهم

و فرحنا قوي لما سمعنا الكلام ده و قلنا الحكايه بقت عامله زي شركات المحمول اللي بينقصوا علي بعض لارضاء المشتركين ،لكن مفاتش يومين الا و المشاكل اشتغلت اكتر مالاول!!النت فصل خالص ايام ورا بعضها و نتنطط مهما نتنطط و صاحب النت و لا سائل قال ايه: صاحب الشبكه التانيه وصل الشبكتين ببعض و خلي التردد المزدوج يقطع النت في شبكته علشان يقرفه و يقرف المشتركين عنده و ده مريحه لانه لسه ملمش مشتركين
قوم ايه ،احنا اتضايقنا و تضامننا مع صاحبنا .لكن النت فضل فاصل باقية الشهر كله و كل يوم يقول لنا فيه مشاكل في الروتر الفلاني و هصلحه النهارده و مش هياخد اكتر من يوم او اتنين ،و بعد اليومين يجي راوتر تاني و بعد الراوتر نلاقي ان الشبكه في الجنب الفلاني بايظه و عاوزه تتصلح من تاني و بعدها نلاقي المشكله مكنتش في اي واحده من دول !!!لا !دي كانت في بعض المشتركين اللي بيعملوا داونلود باستمرار علي الشبكه عند بس في صاحبها و علشان يضعفوها لان صاحب الشبكه التانيه مسلطهم علشان يطفش باقي زباينه
لكن احنا زهقنا فعلا و طلبنا منه ينهي المشكله باسرع وقت ن فحصل ايه !!اكتشف صاحب النت حدانا ان الناس بتستخدم برنامج مهم قوي قوي هو السبب في المشكله كلاتها الناس بتستخدم برنامج اسمه نت كت و ده بيخلي النت يقطع عن الناس الباقيه علشان تخليه قوي عندك و تعيش حياتك و تقضيها
بصراحه محدش حدانا في البلد صدق حكاية النت كت دي لان الناس عندنا جهله اصلا بالنت فازاي بس يعرفوا برامج مهمه زي دي؟ و بعدين فيه حاجه،،،كان مره اتنين حدانا في البلد بيخططوا يعملوا مشروع كبير ياكلوا منه عيش فقوم ايه قرروا انهم يشتروا انترنت و يروحوا للمرور يطلعوا له نمر و يقلبوه تاكس لكن خافوا عليه لما يشتروه من العين و معرفوش مين هيسوق الانترنت ، ده غير واحد تاني سال زميله المشترك في النت : بكام النت عندكم ؟قال له : ب15 جنيه .قام التاني استرخص الرقم فقال له :تتتتتتت تلاقيه نت قديم
هل ممكن ناس بالنوعيه دي يشتغلوا بالنت كت و للا اي برامج تانيه؟ دا اغلب الناس هنا النت عندها للاتصال بالمغتربين من ابنائها فقط فايه حكاية النت كت دي؟ طبعا انا كان لازم اقول الكلام ده علشان اشيل المشكله دي من صدري و كمان علشان اي زميل استاخرني في التعليقات اللي تعودوا اني اعلق لهم بيها علي كل كتاباتهم لاني فعلا غايب بقالي يجي شهر عن التعليق عند الاصدقاء ،و يارب مشكلة النت تنتهي دعوه لزيارة مدونتنا الجديده فنون جميله لكل زوار ذو النون المصري
كتبها ذو النون المصري
الصور بحث نت
.......................

هناك 16 تعليقًا:

yasmina يقول...

مرحبا بعودتك
وارجو ان لا ينقطع النت مرة اخرى

سلامي

mo'men mohamed يقول...

ساعات بتكون الحكاية دى بفايدة هعلينا احنا
الناس دلوقت بقت بتنافس بعضها فى كل حاجة وخاصة لقمة العيش
مبروك على المدونة الجديدة
واتمنى لك التوفيق
السلام عليكم

فى القلب يقول...

يا سيدى يروح النت يجى النت البت التت
أحنا ديما هنستناك
وبعدين بألك ايه متخش على وصله التليفون على بال ماالحكايه دى تتصلح
والعيب فى الحكايه دى أنك هتفضل شاغل خط التليفون طول ما انت قاعد على النت
وارجع وأقولك برده هنستناك

صاحب البوابــة يقول...

مرحبا بك من جديد

تحياتي

kaed يقول...

نون اخى
هو النت حداكم بقى زى النت حدانا دايما كاسفنا و مبيكملش يوم والتانى على طول يقوم قاطعلوا بتاع إسبوع
صبرنا يا رب

عاليا حليم يقول...

و الله يا بوى النت حدانا مغلبنا بردك يعنى أختك عاليا بجالها يجى ساعة دلواقيت قاعدة تفتح فى صفحة واحدة
اخرتها أيه الشغلانة دى ما خبراش

Xee يقول...

متفتحنيش يا عم نون في موضوع النت ده
اصل انت مجربتش النت اللي هنا
النت هنا لما ييجي، النور يقطع، و لما النور ييجي النت يقطع
و نادرا لما بيجوا الاتنين، المية بتقطع

تقريبا المشترك العمومي عندهم فيه فيشتين بس
:)

تحياتي

david santos يقول...

It frees us of the Mubarak-Bush alliance. In your name: Allah

ذو النون المصري يقول...

ياسمينا
لن انقطع باذن الله
تحياتي

ذو النون المصري يقول...

مؤمن محمد
اشكرك جدا و سعيد بلقاءك قي مدونتي
تحياتي

ذو النون المصري يقول...

في القلب
وصلة التليفون غاليه جدا و عموما الحكايه خلاص اتظبطت
سعيد جدا بالتفاعل
تحياتي

ذو النون المصري يقول...

صاحب البوابه
اشكرك جدا
تحياتي

ذو النون المصري يقول...

قائد
اهو النت حدانا فعلا بقي عامل زي النت حداكم بيكسفنادايما و معري وشنا
شفت اخرتها
اهي الحكايه كل يوم في النت بتقلب بغم
النت اسعاره بيقولوا هتغلي جامد
الميجا بعشره جنيه و الحسابه بتحسب
تحياتي

ذو النون المصري يقول...

عاليا حليم
يبدو ان النت مغلب الناس كلها و في كل حته في مصر
مش هتتحل الا بالانقلاب علي النظام
و انا مليش دعوه بالانقلاب
تحياتي

ذو النون المصري يقول...

زياد
طبعا لازم تعلق بخفة الدم المعهوده فيك
و الله باسعد جدا لما اقرا كلامك او تعليقاتك
تحياتي

ذو النون المصري يقول...

mr:
david santos
thank you very much
iam happy for your visit