الجمعة، أغسطس 29، 2008

حفل زفاف في الكنيسه



فرح ايهاب ماهر في الكنيسه
يوم الاحد 24 اغسطس 2008
.................................

ايهاب ماهر صادق ..احد اصدقائي،رايته لاول مره في المدرسه الثانويه في الصف الثاني.كان جسمه ممتليء في غير طول واضح و ببطنه كرش في بداية نموه.و منذ ان تعرفنا عن طريق زميل اخر هو اسحق راغب لم تنقطع لنا علاقه و لم تفتر لنا صداقه .الي ان دخلنا معا كلية التربيه الفنيه بكفر الشيخ و قويت صداقتنا اكثر فاكثر .مرت سنوات حتي اذا كنا في الفرقه الثانيه او الثالثه و كنا نلاحظ انفراد زملائنا المسيحيين بانفسهم في بعض الاماكن يرتادونها جماعات من مختلف الفرق و التخصصصات و كنت الاحظه في بعض الاحيان بينهم و لم اكن اعبا كثيرا بهذه الملاحظه الي ان اثارت حديث بعض الزملاء فقلت لهم ان ايهاب كثيرا ما يتواجد معهم و الامر عادي لا غرابة فيه.ففاجاني احد اصدقائنا بالدفعه بقوله ان ايهاب مسيحي ايضا!! فرفضت تصديقه مؤكدا باني اعرفه منذ سنوات و ليس مسيحيا اطلاقا فاقسم الجميع بانه مسيحي علي طريقة فيلم صلاح الدين ليوسف شاهين باسلوب فيه سخرية مني و حدود درايتي الضئيله بابسط المعلومات عن اصدقائي.
بصراحه رغم كل ايمانهم التي اقسموها علي صدقهم فانا ابدا لم اصدقهم و حينما شككت في احتمال صدقهم قلت لنفسي اساله.. و امسكت بيده و قلبتها كي اري علامة الصليب علي رسغه فلم اراها فسالته معتقدا صحة معلومتي و متيقنا منها :انت مسلم ؟؟ قال لي :لا انا مسيحي ،،و بعدين فيه ايه ؟؟و ضحك و ضحك الجميع ،و وقفت انا في منتهي الاحراج من غبائي في طريقة السؤال و غبائي في السؤال نفسه
انهينا الدراسه و بقيت العلاقه و الصداقه و قويت برغم مرور السنين ،و منذ ايام راني اخرج من المسجد في المدينه فناداني من جانب الطريق و كان معه رجل كبير في ا لسن ظننته والده فاخبرني بعد ان سلمت عليهما بان زواجه سيكون الاحد في كنيسة مارجرجس الساعه الثامنه و علي ان اخبر فارس صديقي و صديقه و لا يجب ان نتاخر في حضور عقد الزواج في الكنيسه او الحفل في مساء اليوم نفسه في قاعة القوات المسلحه .و بالفعل حضرت مراسم عقد القران و الحفل في اليوم المحدد و كان اول من رايته في طرقة الكنيسه هو اسحق راغب نفسه و كان رفيقي طوال الحفل و كانت لنا نكات كثيره في هذا اليوم و كانت اول مره ادخل فيها كنيسه في حياتي و اري فيها مراسم زواج
بدات مراسم الاحتفال في الكنيسه بتراتيل تشبه تماما تراتيل عيد الميلاد و بها ادعيه تشبه تماما الادعيه التي تقال في احتفال عيد الميلاد،فهناك قسيس كبير و اخرون خدام للكنيسه يرددون مع بعضهم هذه التراتيل .و اجلسوا العريس و عروسه علي كرسيين و دعوا لهما بالادعيه الدينيه و وصاهما القسيس بوصايا دينيه من الكتاب المقدس و رسم لهما الصليب علي رقبتيهما و جبهتيهما و الرسغين لهما معا و البسهما تاجان من الذهب و استمرت التراتيل ساعه كامله كنت اود ان اكتبها بالتفصيل في بوست مستقل لكن لا يوجد وقت كاف
ومن المصادفات ان يوم افتتاح الدوره ضحيت بالحفل لصالح حفل زواج شهروزه و في ختامها لصالح حفل زواج ايهاب ماهر
..............................................
نكاتي مع اسحاق
..................

قبل وصل العريس
العاب ناريه يدوي صوتها خلفنا
اسحق قال لي :الحق العريس انضرب بالنار و مش جاي
نار مين يا عم
صدقني و الله ايهاب انضرب بالنار
من تاني صوت الالعاب الناريه
صدقتني ..ايهاب انضرب بالنار و مش جاي ياللا قوم نروح
ههههههههههههه
....................................
في الحفل بعد وصول العريس
العروسه بترقص بحيه و عفويه و هو لا
قلت لاسحق :الحق العروسه بترقص و ايهاب عامل زي الطوبه
قال لي اصله متجوزش قبل كده
ههههههههههه
.............................
بعد ساعه من الفرح
ايهاب بدا يرقص شويه
قلت له ايهاب فكها و بدا يرقص
قال اه فعلا
قلت له هيجي منه علي الجوازه الجايه
ههههههههههههه
..............................
فقره في الحفل خاصه بالراغبين فيا لتصوير مع العروسين و بدا الشباب و الفتيات في الذهاب للكوشه للتصوير
قلت له يللا قوم يا جدع نتصور معاهم
كان غير راغب في القيام
حاولت اشجعه
قال لي انا مش عاوز اروح
اصل ما فيشس غيرنا و مبحبش اكون واقف هناك لوحدي
انت عارف لو فيه زحمه هناك !!كنت قمت رحت
ههههههههههه
........................
بعد ما وزعوا الجاتوهات و الحاجه الساقعه و كنت بدات اتململ من التاخر و رغبت في الانصراف
قلت له فاضل في الحفل كتير؟قال لي لسه حبه
بس خمسه و بعدين نمشي
علشان شكلنا ميبقاش بايخ
ميقولوش كلنا و مشينا
ههههههههههه
........................
..................

هناك 10 تعليقات:

investing يقول...

ok. I found an information here that i want to look for.

عاشــــــ النقاب ـقــــة"نونو" يقول...

عقبااااااااالك
حضرت مرة فرح من خمس سنين في الكنيسة
بس كان خطوبة
ما شفتش فيه غير انهم وقفوا وقالوا كلام وادعية تخصهم وبعدها العروسين وقعوا في دفتر وبس
انما الزفاف طقوسه بقى اللي قلتها حضرتك
اللي انا حضرته كان في القاعة الملحقة بالكنيسة
مش في الكنيسة نفسها
ما اعرفش برضه فيه فرق ولا لا
الامهم عقبالك
كل عام وانتم بخير

dr.Roufy يقول...

حضرت افراح وتعازي في الكنيسة ..وأدعو الله أن احضر فرح صديقتي المقربة منذ الطفولة .. قريبا في الكنيسة كذلك
:)
بوست جميل وعميق

رمضان كريم يافندم

مجهول يقول...

كل عام وأنت بخير وكل أحبائك بكل خير وسلامه وربنا يتقبل منا جميعا صالح الأعمال ,, اللهم أدم علينا طاعتك ونعمك

رمضان كريم
>>>>>>>>>
يارب تكون بخير يا ذو النون يا مصري يا أصيل

عدى النهار يقول...

كل رمضان وأنت بخير
:)

ذو النون المصري يقول...

اول تعليق
زرت موقعك و مفهمتش اي حاجه
بالاصح محاولتش افهم
شكرا للزياره
تحياتي

ذو النون المصري يقول...

نونو
دي اول مره ادخل فيها كنيسه و لسه ما اعرفش الفرق
تحياتي

ذو النون المصري يقول...

د روفي
و لها مني نفس الدعوه و الامنيه
تحياتي

ذو النون المصري يقول...

مجهول
كل سنه و انت طيب

ذو النون المصري يقول...

عدي النهار
كل عام انتم بخير