الاثنين، أبريل 28، 2008

يوم في المدرسه

العمل في التربية و التعليم مرهق جدا
يكفي فقط ان كان لديك اطفال ان تجلس ساعتين او ثلاث ساعات بين اولادك و تحاول الاستجابه لطلباتهم و التوفيق بينهم في خلافاتهم كي تعرف و تتاكد الي اي مدي نحن نتعب في ممارسة عملنا و ان اي اخطاء تحدث غالبا ما تكون قهريه بعد ان قهر المدرس طباعه و نفسه و احتياجه الي الراحه فاضطر لقهر تلاميذه كي ينال قسطا من الراحه و لا يمكن لاي فرد ان يقدر فرحة المعلمين بهذه الايام المتتاليه للاجازات لذلك كتبت احداث دقائق قليله منذ لحظة دخولي الفصل الي لحظة الثوره علي التلاميذ و اليكم الانباء بالتفصيل
................................................................
اول تلميذ لحظة دخولي الفصل
التلميذ: استاذ
انا :نعم
هو:احمد واخد مسطرتي و مش راضي يديها لي
انا:خش خدها منه
هو :استاذ
انا :نعم يا سي نيله
هو:احمد واخد مسطرتي و ضربني علي دماغي
انا :خش هاته ،تعالي ياض هنا
....................................
غيره :استاذ
انا :نعم
هو:اسلام بيقول لي انت بتسرق عصافير
انا:بتقول ايه ،عللي صوتك
هو:اسلام بيقول لي انت بتسرق عصافير
انا : خش يا ابن .......و انا اعنل ايه ،ميقول جرالك ايه يعني
.......................................
غيره:استاذ
انا :عاوزه ايه يا بت
هي :هناء زغدتني في جنبي
انا :زميلتك و بتهزر معاكي
.....................................
غيرها:استاذ
انا : نعم ..عاوزه ايه ...افندم
هي :شيماء هزت التوكه في شعري
انا :خلاص يا ستي مهزتش وسطها قدام الناس يعني
.................................
غيره:استاذ
انا :نعم
هو:ارمي الورقه دي ورا الباب
انا:ماشي ارميها
..............................
غيره:استاذ
انا :نعم ،خلصني
هو:ارميالورقه دي ورا الباب
انا :خلاص هو كل واحد لوحده مره
امشي ارميها و اخلص
................................
غيره:استاذ
انا :نعم
هي: ايه يا استاذ ، اخدت الخمار بتاعي يا استاذ ،و انا يا استاذ كنت حطاه يا استاذ في درجالدكه يا استاذ
انا :و انتي خلعتيه ليه
هي : م الحر يا استاذ و هي اخدته يا استاذ
ايه عن بعد: ما اخدتش منها حاجه يا استاذ
................................
غيرها:استاذ
انا : نعم
هي : اقف عليهم يا استاذ؟
انا : لا مش عاوز حد يقف عليهم و لا عاوز حد يكتب اسامي
..............................
غيره :استاذ
انا : نعم
هو :اتنين بيتعاركوا
انا : اقف انت و هو
...............................
غيره :استاذ
انا : نعم
هو :اقف عليهم اكتب الاسامي
انا : قلت يا زفت لا مش عاوز حد يقف عليهم
.....................................
غيره:استاذ
انا : نعمين
هي : ايه بتلعب "بغل"
بغل بضم الباء و فتح الغين و تشديد اللام
انا :هاتي يا بنت البغل اللي معاكي دي
جابت البنت خمس حصوات
انا : حطيهم علي الترابيزه قدامي
...............................
تلاته غيرهم: استاذ
انا : نعم
هم:نروح الحمام
انا :لا لا لا
.............................
غيره: استاذ
انا : نعم
هو : حسين بيضربني و بياخد مني الالوان اروح اجيبه
انا : لا خش بس دلوقت
...............................
غيره : استاذ
انا : نعم
هي : هنرسم ايه
انا : اسكتوا و هتعرفوا دلوقت
............................
غيره : استاذ
انا : نعم يا سي زفت
هو : خد الواني و وقعلي كتبي يا استاذ
انا : وقعهالك فين يعني؟ خش بقي مهي مش كل حاجه تعملوا منها شكوي كبيره كده
................................
غيره : استاذاروح الحمام
انا : لا مهو مش كل واحد لازم اقول له لا لوحده
...................................
غيره: استاذ
انا : نعم
هو: حسين خد الواني ووقعلي كتبي في الميه و ضربني علي راسي
انا : خش يلعنك انت و حسين الحصه قربت تخلص
.......................................
غيره: استاذ
انا : نعم
هو: محمود قام ضاربني علي ضهري
انا : ييييييييييييييييييييييييييه
.................................
غيره : استاذ ، هنرسم اسه
انا : هنفول اهه
...............................
غيره: كده يا استاذ
كان بيوريني رسمه القديم
انا : لا مش كده
من غير ما ابص علي كراسته
هو : امال ارسم ايه؟
انا : تجاهلته
...............................
غيره : استاذ
انا : عاوز ايه؟
هو : اللي معهوش كراسه و الوان هينضرب؟
انا : لا
..............................
غيره: استاذ
انا : نعم
عبد الله هاني ضربني علي راسي و عوجلي دراعي
انا : زميلك متزعلش منه
............................
غيره : استاذ
انا : نعم
هو : احمد يا استاذ بيطلع لي لسانه
.....................................
غيره : ياسمين قاعده تشتمني يا استاذ
تالت: الاتنين قاعدين بيشتموا بعض
.......................................
في ا لنهاية الحصه خلاص تقريبا بتخلص الا اذا استعملت العصايه و اسكتهم بالقوة لاجل ذلك فايام الاجازه الماضيه كانت ايام سعيده فعلا للمدرسين خاصه و انا منهم
.....................................
انا خلاص اسست المدونه الثالثه و عنوانها فلسفة حياة و ياريت تزوروها و تقولوا لي رايكم و افكاركم لتطويرها انا كتبت فيها بوستين اتنين(مثني بوست) و فكرتها سهله هتاخدوا بالكم منها اذا زرتوها
....................................
انا الريدر في مدونتي حيرني ، نفسي اعرف ازاي احدث الماده اللي فيه، بنت القمر مشكوره عرفتني ازاي اعمله و شرحتلي تحديثه لكن فشلت الي الان في تحديثه ، فياريت شرح تاني و كمان ازاي الريدر عند بعض الناس بيحدث لوحده تلقائيا
...................................
انا برضه احترت في عمل السليد في المدونه ياريت تعرفوني ازاي اعمله علشان انزل معارض فنيه علي مدونتي فنون جميله لان المعارض عندي كترت و مش عارف اعرضها من غير سليد، و بالنسبه للفيديو هسال عنه فيما بعد لاني مش محتاجه الان
نرجو الافاده
......................

هناك 20 تعليقًا:

يَحيى المِصري يقول...

رجعتني لأيام زمااان
و الله المدرسين كانوا بيصعوا علي

بقول لك إيه يا أستاذ هي اللوحة اللي فوق بتاعة مين

سمراء يقول...

اول مرة دخلت فيها فصل وحصل معايا الموقف ده
قلت للطفل احمد ده صحبك قال لى نعم قلت له احمد مش صحبي صحبك انت ممكن تفاهم معاه انا مبخشش بين الاصحاب
الولد بص لي باستغراب وراح مكانة وانفضت المشكلة لوحدها ومحدش قال لى حاجة تاني
ربنا يكون في عونك
سمراء

NilE_QueeN يقول...

مهنة التعليم مهنه ف منتهي السمو والرقي

بس التعامل مع الاطفال بيكون صعب جدا لانهم بيكونوا على حسب وصفي اطفال بطريقه مبالغ فيه مجتمعنا مش بينمي تفكير الطفل انه يتعامل مع مشاكل سنه بطريقه تتناسب مع تفكيره دايما بيلجاء لحد

اعانك الله

HafSSa يقول...

ههههههههههههههههههههههههههههههه

فكرتني بالذي مضى يا نون
بس مكنتش متوقعة منك الردود دي
انا حاساك مهذب اوي حتى مع الاطفال
بجد ردودك تحفة مع الاطفال
بس صدقني انا اللي درستهم كانوا معجونين بمية قرود
كنت ادخل الفصل الاقيهم متشعلقين على الدكك و الحيطان متعرفش ازاي
بس والله احسن من مليون شغلانة تانةي
تحس انك بتعمل معاهم حاجة
ربنا يكون في عونك

kafrawy يقول...

ههههههههههههههههههههههه

ياعم انا لو مدرس زيك
كان زمانى خابط كل يوم عيلين تلاتة
ف الحيطة و فاتح دماغهم

________
بالنسبة للسلايد كلمنى ياعم ع اللايمل و اانا اعرفك ازاى بيتعمل
دى وصفة سهلة

nonoymm يقول...

ههههههههههههههههههههههه
فكرتني بالذي مضى
بس عادي مش عال بس تفرس اخ اليوم بئى الواحد وكانه ا بيغني مع جماع طرش بيرجع بصداع والتهاب في الزورن لله المجموع هو اللي رماني الرمية دي
تحياتي
بوست دمه خفيف
مبروك المدونة

نور فريد يقول...

اكيد ابتدائي صح
بس والله زي العسل صحيح لو واحد قال هروح الحمام الفصل كلو هيروح معاه لو وحد عيز مياه الكل بروح معاه بس بجد البنات المراحل الأبتدائيه الدنيا يجننو لو بحبو المدرس هيعملو كل حاجا هو عيزها ده غير الشوكلاته الي هتجيلك كل يوم غير البوس على اخر اليوم وعليهم قفشات تجنن في بعض الأحيان وأساله تدوخ تخليك تلف تلف عقبال ماتلقى الأجابه انا مش بتعب مع العيال الي بيتعبني بجد التحضير ومزاج الأداره بصرحا والموجهه الي مش عرافا هيا بتعمل ايه اصلاً او الهدف من وجودها إيه بس بجد كل الي بيحصل معاك بيحصل في كل الدنيا كوبي بست ربنا يقوي المعلمين ويحسن رواتبهم يارب

dina يقول...

اولا:
ماساة الادميه انها تبدا من الطين وان عليها ان تحتل مكانتها بعد ذلك بين النجوم
الجملة دى شدتنى جداااااااا اول ما دخلت المدونة لانها بجد صادقة جدا
ثانيا:
عاوزة اشكرك جداااااا على زيارة مدونتى و على الاقتراح الهايل و انا رديت عليك و يا ريت فعلا نفكر ازاى نطبق الاقتراح دا خصوصا انك طلعت اصلا فى مجال التعليم
ثالثا:
الاغنية اللى فى المدونة تجنن و لايقة جدا بالنسبالى على البوست الاخرانى بتاع حضرتك..تقولى ليه..اقولك لانها رنة موبايل اعظم مدرس عدى عليا فى حياتى عشان كدا الغنوة مع كلامك عن التعليم و التدريس عملى جو تانى كدا و بجد انتوا بتتعبوا جدااااااااااااااااااااااا بس احلى حاجة انك تفضل مع الطلبة بتوعك بذكرى حلوة طول عمرهم و انا متأكدة ان كلهم مش حينسوك ابدا
تحياتى

جني يقول...

‏إخي ذو النون
إن عمل المدرس من عمل الرسل وقول شوقي ( كاد المعلم أن يكون رسولا ) لم يكن من فراغ .. وقول الرسول صلى الله عليه وسلم لشرف عظيم لكل معلم :
عن ‏‏أبي أمامة الباهلي ‏ ‏قال ‏
ذكر لرسول الله ‏ ‏صلى الله عليه وسلم ‏ ‏رجلان أحدهما عابد والآخر عالم فقال رسول الله ‏ ‏صلى الله عليه وسلم ‏ ‏فضل العالم على العابد كفضلي على أدناكم ثم قال رسول الله ‏ ‏صلى الله عليه وسلم ‏ ‏إن الله وملائكته وأهل السموات والأرضين حتى النملة في جحرها وحتى الحوت ليصلون على معلم الناس الخير ) سنن الترمذي
أما قهر التلاميذ لنيل قسط من الراحة فأنا لست معك يمكنك تحويل الحصة لمتعة لك ولهم حاول أن تشغلهم وتشغل الحصة من أولها لآخرها قم بعمل أنشطة صفية .. شكل منهم مجموعات للتعلم التعاوني .. أخرجهم من الفصل واذهب بهم إلى مكان مفتوح وأشغل تفكيرهم بموضوع جديد وهكذا ..
وإن شاء الله أزور مدونتك الجديدة
مع تحياتي
said

ذو النون المصري يقول...

يحيي المصري
اللوحه اللي في البانر من اعمال جوستاف كلارينس رودولف
اكيد عجبتك هو علي فكره كل اعماله خاصه بالبيئه البدويه العربيه و ناوي اشرح له بعضها قريبا
تحياتي

ذو النون المصري يقول...

سمراء
خلاص اجرب و اعمل زي ما عملتي جايز ارتاح
تحياتي

ذو النون المصري يقول...

ملكة النيل
التعامل مع الاطفال فعلا صعب لاننا المفروض ننزل لتحت جامد قوي
تعرفي ان الشائع ان مدرسي الابتدائي اذا مارسوا التعليم لسنوات طوال ممكن عقلهم يتاثر بعقول الاطفال؟؟؟؟؟؟؟؟
ده الشائع بين المعلمين الان

ذو النون المصري يقول...

حفصه
رافعه معنوياتي دايما
فعلا انا حاسس اني بعمل معاهم شيء مفيد هيفتكروني بيه علي الاقل
و انا كمان باشتغل مع عيال معجونين بمية قرود زيك بالظبط

ذو النون المصري يقول...

كفراوي
ان شاء الله اكلمك علي الميل بس ياريت النت يبطل تقطيع لانه كل يوم في حال و هحاول اكلمك في اقرب فرصه

ذو النون المصري يقول...

nonoymm
اشكرك جدا علي التهنئه و عقبالك لما تفتحي مدونه او اتنين جداد
تحياتي

ذو النون المصري يقول...

نور فريد
و الله ضحكتيني بحكاية انو بيحصل في كل الدنيا دي
كوبي بيست
فعلا و الله تعبير ظريف جدا
تحياتي

ذو النون المصري يقول...

دينا
انا سعيد بالطبع لان اول زياره ليكي لمدونتي لفتت انتباهك
علي فكره الجمله دي من كلمات نجيب محفوظ في رواية حضرة المحترم
بالنسبه للاقتراح اعتقد ان المفروض نعمل جروب علي الفيس بوك علشان نضمن تجاوب اكبر
ايه رايك نبدا الدعوه و نحاول نجذب ليها اكبر عدد ممكن من الناس؟
تحياتي

ذو النون المصري يقول...

جني العزيز
انا مش بابحث عن الراحه لان عملنا مستمر طوال العام و طوال اليوم في وسط عشرات التلاميذ و ده بيسبب لنا ازعاج حتمي لازم نبحث عن الراحه اثناء العمل لاجل تماما العمل
هذا ما قصدته
بالنسبه للانشطه الصفيه فانا بحاول اعملها فعلا بس الميزانيه للمدرسه بالكامل سبعه و خمسين جنيه بس اشتريت بيهم كام لوحه و شوية علب الوان لجدران المدرسه

ما علينا يقول...

السلام عليكم ورحمة الله وبركاته

بما انك كفراوي نبقى اكيد بلديات
ودا شيء يشرفني ومن دواعي سروري
ان بلدياتي يكون انسان مثقف زيك كدا

بس بجد بجد وبرغم اني ما كنتش معاك في الفصل واني الحمد لله لا اعمل بمهنة التدريس

العيال دول اما كنت هاسرحهم برا الفصل

او هانزل فيهم طحن

والاغلب والاعم اني كنت هشوف لعبة مشتركة العبها معاهم
او انزل اشخبط انا وهم على جدران المدرسة

دايما لما حد يقولي ليه ما دخلتيش تربية فنية وانت بتحبي الرسم وتشتغلى مدرسة

اقول حرام التلاميذ اكيد اكيد كنت هاتلف املهم او ارتكب فيهم جنايات


بجد كان الله في عونك

وسعيدة جدا بزيارتك مدونتي واسفة على عدم التواجد للرد الفترة اللي فاتت

ذو النون المصري يقول...

ما علينا
سعيد جدا بزيارتك و اكيد الزيارات هتكون متبادله باستمرار باعتبار اننا بلديات
التدريس هتفضل مشاكله زي ما هي
اللي فيه فيه